Gürcüstan parlamenti 49 müxalif deputatın mandatına son verib. Qərar parlamentin sessiyasında keçirilən səsvermədə qəbul edilib. Səsvermənin nəticəsini deputatlar alqışlarla qarşılayıblar. Parlamentdə müxalif partiyalardan yalnız sabiq Baş nazir Giorgi Qaxariyanın “Gürcüstan naminə” partiyasının 12 mandatı qalıb. Bununla da 150 yerlik Gürcüstan parlamentində yalnız 101 deputat qalıb.
Qeyd edək ki, 26 oktyabr seçkilərinin nəticələrini tanımadığını bəyan edən müxalifət koalisiyaları parlamenti legitim hesab etmədiklərini bəyan ediblər.
Mövzu ilə bağlı "Sherg.az"a danışan politoloq Turab Rzayev bildirib ki, Gürcüstandakı siyasi böhranın uzun müddət davam edəcəyi gözlənilir:
"Müxalifət etiraz aksiyalarını dayandırmır, ABŞ və Avropa İttifaqı isə Gürcüstan üzərində təzyiqləri artıraraq hüququn aliliyinə riayət olunmasını tələb edir. Ölkə Şengen vizasından azad edilmə məsələsində risklə üz-üzədir və lazımi addımların atılmaması bu prosesin dondurulmasına səbəb ola bilər. Yeni seçkilərin keçirilməsi tələbi də gündəmdədir və hüquq-mühafizə orqanlarının etirazçılara qarşı güc tətbiqinin dayandırılması istənilir. Müxalifət isə minimum bir il ərzində yeni seçkilərin keçirilməsini tələb edir. Digər tərəfdən parlamentin legitimliyi məsələsi də narahatlıq doğurur. Əgər müxalifət seçkilərdə iştirak etməsə və parlament yalnız hakim partiyadan ibarət olsa, bu, qanunverici orqanın fəaliyyətini şübhə altına alacaq. Yəni fərqli siyasi baxışların təmsil olunmadığı parlamentin effektiv qanunvericilik fəaliyyəti göstərməsi çətin olacaq və onun legitimliyi mübahisələndiriləcək. Keçmiş prezident Zurabaşvili də parlamentin legitimliyini şübhə altına alaraq, seçkilərin saxtalaşdırıldığını bildirmişdi. Bu mövzu yenidən gündəmə gələcək və etiraz aksiyalarının artmasına səbəb olacaq. Nəticədə, müxalifət və vətəndaş cəmiyyəti hakimiyyəti qeyri-legitim hesab edir və dəyişiklik tələb edir. Hökumət isə mövqeyindən geri çəkilmək fikrində deyil. Bu vəziyyət Gürcüstandakı siyasi qarşıdurmanın hələ uzun müddət davam edəcəyini göstərir".
