Nəinki sünni - şiə arasında hətta dinlər və dinlərin mənsubları arasında sarsılmaz bağlar var
"Azərbaycan şiə və sünni müsəlmanların eyni vaxtda eyni məsciddə ibadət etdikləri az sayda ölkələrdən biridir".
Bunu Azərbaycan Prezidenti İlham Əliyev “Əl-Ərəbiyyə” telekanalına müsahibəsində deyib.
"Biz fərq qoymuruq. Biz düşünürük ki, müsəlman dünyası üçün ən böyük təhlükə təriqətlərə ayrılmaqdır. Müsəlman dünyasına ən böyük ziyanı təriqət ayrılığını təbliğ edən insanlar vururlar. Biz bir olmalıyıq. Biz müsəlmanıq və bizim üçün bir nömrəli məsələ budur. İstənilən xarici müdaxilədən tamamilə azadıq. Çünki biz təkcə dəyərlərimizi təbliğ etmirdik, biz, həmçinin ideoloji cəhətdən özümüzü istənilən növ müdaxilədən, müsəlmanlar arasında nifrət toxumu səpmək cəhdlərindən qorumalı idik. Bu, müsəlman dünyasında yüksək qiymətləndirilir", - Prezident qeyd edib.
İlahiyyatçı Tural İrfan “Sherg.az”a bildirib ki, Azərbaycanda tarixən tolerantlıq mühiti hökm sürüb:
“Heç bir xarici təsir, heç bir yad elementlər bu mühiti poza bilməyib. Amma cəhdlər olub, bu gün də var. Lakin dövlətin apardığı səmərəli dövlət - din münasibətləri hər zaman dinlər və məzhəblər arasında harmoniya yaradıb. İnsanlar qaynayıb - qarışıb, qohumluq əlaqələri, sosial münasibətlər inkişaf edib. Nəinki sünni - şiə arasında hətta dinlər və dinlərin mənsubları arasında sarsılmaz bağlar var. Biz kilsəyə gedib xristianlarla görüşürük, həmçinin onlar bizim tədbirlərə qatılır, yəhudilərlə də çox səmimi münasibətlər mövcuddur. Həmçinin başqa dinlərin və konfessiyaların mənsubları ilə gözəl münasibətlər inkişaf etməkdədir. Xalqımızın dərin, zəmin mənəvi kökləri, tarixi, milli dəyərlərimizin sağlam şəkildə günümüzə gəlib çatması buna daha da təkan verir. Cənab Prezident tamamilə yerində vurğulayıb ki, ölkəmizdə sünni və şiələr eyni məsciddə, eyni sırada namaz qılırlar. Bu, bütün dünyaya örnəkdir. Çünki bir çox ölkələrdə məzhəblər, dinlər arasında uçurumlar var. Azərbaycanın dini tolerantlığı, multikultural dəyərləri yaşatması demək olar ki, əksər ölkələrə örnək göstərilir. Vəhdət, həmrəylik, milli və dini yöndə qarşılıqlı münasibətlərin ən yüksək dərəcədə yaşadılması əslində unikal nümunədir. Dini tolerantlıq milli həmrəyliyə də töhfə verir. Cənab Prezident İlham Əliyevin təşəbbüsü ilə məscidlərin təmir - bərpa olunması, ələlxüsus Qarabağda işğaldan azad edilən qədim dini abidələrin yenidən bərpası dövlətin dinə və dini dəyərlərə ayırdığı qayğının nümunəsidir. Bu günki tolerantlığın, multikultural dəyərlərin inkaf etməsinin, məzhəbçilik qarşıdurmasının olmamasının, eyni məsciddə sünni və şiələrin eyni imama tabe olaraq namaz qılmaları dünya üçün bir Azərbaycan nümunəsidir. Bu sağlam mühitin bərqərar olmasında dövlətin, xüsusilə cənab Prezident İlham Əliyevin apardığı siyasətin əvəzsiz rolu var. Belə bir mühiti kənar yad təsirlərin, xarici təxribatların cəhdlərini puça çıxararaq yaratmaq çox çətindir. Lakin dövlətin din - dövlət münasibətlərini sağlam şəkildə qoruması və bunu təmin etməsi həmin çətinlikləri, təhlükələri dəf edir və hazırda ölkəmiz müsəlman vəhdətinin beşiyinə çevrilir”.
