Alimlər dünyanın yeganə dağ tutuquşusu olan “Kea” adlı tutuquşuları barədə maraqlı faktlar tapıblar.
“Sherg.az” türk mediasına istinadən xəbər verir ki, “Kea” tutuquşularının dağlarda yaşama səbəbi insanlardan qaçmaqdır.
Yeni Zelandiyadakı Alp dağlarında yaşayan quşlar “unikal alp tutuquşuları" kimi də xarakterizə olunur. Son araşdırmada DNT analizləri nəticəsində “Kea” quşlarının bir vaxtlar ölkənin digər bölgələrində yaşadıqları ortaya çıxıb.
Nəsli kəsilməkdə olan bu tutuquşular həyat tərzini dəyişdirmək və dağlarda yerləşmə qabiliyyəti ilə iqlim böhranından xilas ola bilərlər.
Mütəxəssislərin fikrincə, dağ şəraitinə uyğunlaşan “Kea”lar iqlim böhranı səbəbindən daha çox yox olma təhlükəsi ilə qarşı-qarşıyadırlar. Ancaq “Molekulyar Ekologiya” elmi jurnalında yayımlanan araşdırmada yazılıb ki, dağ mühitindəki qlobal istiləşmə “Kea” tutuquşularının meşələrə dönmə ehtimalını artırır.
