Türkiyənin Ankara şəhərində bir iş mərkəzində 30 ildən artıq qapıçı işləmiş Mehmet Kaşkayanın övladlarına buraxdığı mirası “dodaq uçuqladır” - Çankayada 8, Pursaklarda 3 ev və torpaq sahəsi, bankda böyük miqdarda qızıl və 700 min lirəlik mal-dövlət. M.Kaşkayanın 4 oğlu və 1 qız övladı var. Atanın ölümündən sonra var-dövlət üzərindən məhkəmə çəkişməsi başlyıb.
Qardaşlar bacılarının atanın xəstəliyindən istifadə edərək bütün var-dövləti öz adına keçirdiyini iddia edərək məhkəməyə üz tutublar. Məhkəmə 10 ildir ki, davam edir. Qardaşlar atalarına qulluq etsin deyə, bacıları Gülvadə Gümüşü ata evinə yaxın bir mənzilə yerləşdiriblər. Qardaşlar iddia edir ki, bacıları ötən illər ərzində atadan miras qalan mənzillərdən alınan kirayə pullarını təkbaşına mənimsəyir. Oğullar onu da iddia edir ki, ataları son illərdə “demans” xəstəliyinə tutulub, yaddaşını, ağlını itirib.
Maraqlı burasıdır ki, məhkəmə işi M.Kaşkayanın sağlığında başlayıb, hələ də davam edir. Bu müddətdə Gülvadə Gümüş atasının imzasıyla 6 mənzilə sahiblənib, bankdan böyük miqdarda pul çıxarıb. Məhkəmə kişinin həqiqətən xəstə olub-olmadığının müəyyənləşdirilməsi üçün tibbi ekspertiza təyin edib. Lakin bacıları atalarının ağlının yerində olmasına dair həkim rəyi əldə edib. G.Gümüş Pursaklardakı mənzilin birini oğlunun dostunun adına keçirib.
Qardaşlarsa mirasın onların hər birinə aid olduğunu iddia edərək sənədin ləğvini tələb edir. Qardaşlar atalarına aid 1 kiloqram qızılın da bacıları tərəfindən ələ keçirildiyini iddia edir.
2013-cü ildə Ankara hüquq Məhkəməsi M.Kaşkayanın ağlının yerində olmadığından təkbaşına qərar verə bilməyəcəyinə dair qərar çıxarıb. Lakin fərqli rəylər də təqdim edilib.
Qarşılıqlı etirazlar yenə davam edib. Və 7 ildir ki, məhkəmə heç cür yekunlaşmır. Məhkəmə istintaqı uzandıqca uzanır.
