Nizami rayonunda psixotrop tərkibli dərmanların əldə olunması üçün saxta reseptlər hazırlayan dəstə üzvləri saxlanılıblar. Nizami Rayon Polis İdarəsinin Narkotiklərlə Mübarizə Bölməsinin əməkdaşları tərəfindən həyata keçirilən əməliyyat-axtarış tədbirləri nəticəsində narkotiklərin qanunsuz dövriyyəsi ilə məşğul olan Bakı şəhər sakinləri 1999-cu il təvəllüdlü Qulu Salmanov, 1986-cı il təvəllüdlü Əli Balayev, 1986-cı il təvəllüdlü Müşviq Şahbazov və 1987-ci il təvəllüdlü Əzizə Əliyeva saxlanılıblar. Onlardan ümumilikdə psixotrop tərkibli 950 ədəd, o cümlədən 350 ədəd preqabalin, 600 ədəd tramadol həbləri və külli miqdaqda metamfetamin aşkar edilib.
Qeyd edilib ki, Ə.Əliyeva evində hazırladığı saxta reseptləri dəstə üzvlərinə təqdim edərək psixotrop tərkibli dərmanların əldə olunaraq qanunsuz dövriyyəsinin təşkilinə şərait yaradıb.
Faktla bağlı Nizami RPİ-də Cinayət Məcəlləsinin müvafiq maddəsi ilə cinayət işi başlanılıb. Nizami rayonunda narkotiklərin qanunsuz dövriyyəsinin qarşısının alınması məqsədilə polis əməkdaşları tərəfindən mübarizə tədbirləri davam etdirilir.
Məsələ ilə bağlı "Sherg.az"a danışan tibb elmləri doktoru, professor Adil Qeybulla bildirib ki, Dünya ölkələrində psixotrop dərmanlar və onların pekursurlarının dövriyyəsinə nəzarət var:
"Bu dərmanlar tibbi asılılıq yaradır. Psixotrop dərmanlar və onların pekursurlarının dövriyyəsini pozan şəxslər məsuliyyət daşıyırlar. Bu cür hadisələr baş verdikdə hər halda araşdırma aparılır və lazımi tədbirlər görüləcək. Düşünürəm ki, norkotiklərin, psixoterapevt maddələrinin dövriyyəsinə xüsusi nəzarət daha da gücləndirilməlidir. Çünki bu genofondun sağlamlıq məsələsidir. Təəssüflər olsun ki, günümüzdə norkomoniyaya düçar olmuş çox sayda gənclərimiz var. Bu istiqamətdə dövlətin nəzarəti gücləndirilməlidir".
