Yeni araşdırmalar göstərib ki, İngiltərədə hamiləlik dövründə təyin olunan Diethylstilbestrol (DES) adlı dərman qadınlarda süd vəzi xərçəngi riskini 30% artırır.
Sherg.az xəbər verir ki, 1939–1970-ci illər arasında təxminən 300 min qadına aşağı düşmə riskini azaltmaq və süd istehsalını dayandırmaq üçün bu dərman verilib. Araşdırmalar DES istifadə edən qadınların xərçəngə tutulma ehtimalının daha yüksək olduğunu sübut edir.
Həmçinin DES-ə ana bətnində məruz qalan qız uşaqlarında nadir görülən “clear cell” xərçəngi və reproduktiv sistem pozuntuları riski artır.
Bəzi mütəxəssislər DES-i "gizli Thalidomide" adlandırır – çünki təsirləri nəsildən-nəslə keçə bilir. Bir kanalın araşdırmasına görə, 100-dən çox qadın sağlamlıq problemlərinin bu dərmanla əlaqəli ola biləcəyini bildirib. Onların bəziləri nadir xərçəng növləri ilə mübarizə aparır, digərləri isə şiddətli və daimi ağrılardan şikayətlənir.
DES ABŞ-də 1970-ci illərdə qadağan olunsa da, İngiltərədə bu barədə rəsmi addım atılmayıb. Hökumət 1973-cü ildə həkimlərə DES-in menopozdan əvvəlki qadınlara verilməməsi ilə bağlı xəbərdarlıq göndərildiyini iddia etsə də, bu barədə sənəd tapılmayıb.
