“Azərbaycan və Belarus arasındakı əlaqələr günü-gündən inkişaf etməkdədir"
Bunu "Sherg.az"a açıqalamasında millət vəkili, Azərbaycan-Belarusiya Parlamentlərarası Əlaqələr üzrə işçi qrupunun üzvü Naqif Həmzəyev iki ölkə arasındakı əlaqələri dəyərləndirərkən deyib:
O vurğulayıb ki, Azərbaycanın ərazi bütövlüyünün ilk gündən Belarus tərəfindən tanınması, beynəlxalq platformalarda bizim mövqeyimizi dəstəkləməsi, Azərbaycan və Belarus siyasi rəhbərliyi arasında münasibətlərin yüksək səviyyədə olmasından xəbər verir:
"Həmçinin siyasi, diplomatik münasibətlərimizin yüksək səviyyədə olması ilə yanaşı, iqtisadi əlaqələrimiz də ürəy açandır. Belarusun kənd təsərrüfatı teknikasının Azərbaycanda yığılması və istifadə edilməsi, münasibətlərimizin əsas prioritet sahələrindəndir. Bununla yanaşı Azərbaycan məhsulları da Belarusa göndərilir və satılır".
Parlamentari əlavə edib ki, Belarus Azərbaycan hərbi sənayesinin inkişaf etdirilməsinə və ordumuzun arsenalında olan texnikanın müasirləşməsinə də öz töhfəsini verib:
"Azərbaycan Belarusdan hərbi texnikalar alır. Digər tərəfdən enerji resurslarının Belarusa göndərilməsi, bir çox iri şəhərlərə investisiyanın qoyulması Azərbaycan tərəfindən həyata keçirilir. Bu baxımdan Azərbaycan və Belarus münasibətləri artan xətt üzrə inkişaf edir. Hazırda baş verən Rusiya, Ukrayna müharibəsi fonunda, müəyyən dərəcədə durğunluq müşahidə edilsə və logistik baxımdan çətinliklər yaşansa da, münasibətlərin inkişafı üçün hər iki tərəf öz səylərini artırmaqdadır. Biz ümid edirik ki, diplomatik münasibətlərimizin 30 illiyi ərəfəsində Azərbaycanla Belarus arasında iqtisadi, mədəni, siyasi əlaqələr inkişaf edəcək və gələcəkdə də iki dövlət arasında mütəfiqliyin şahidi olacağıq".
Qeyd edək ki, Azərbaycanın Xarici İşlər Nazirliyinin tviter hesabında Belarusla ölkəmiz arasında diplomatik əlaqələrin qurulmasının 30-cu ildönümü münasibətilə paylaşım edilib.
“Bu gün Azərbaycan və Belarus arasında diplomatik əlaqələrin qurulmasının 30-cu ildönümüdür. Azərbaycan-Belarus ikitərəfli əməkdaşlığın daha da dərinləşməsini səbirsizliklə gözləyirik", - deyə paylaşımda bildirilir.
