Putin Ukrayna ilə kifayətlənməyəcək
Keçmiş müşavir bu siyasətin Rusiyaya qonşu olan digər ölkələr üçün də təhlükəli olduğunu bildirib
ABŞ-nin keçmiş milli təhlükəsizlik müşaviri Con Bolton Rusiya Prezidenti Vladimir Putin və keçmiş ABŞ Prezidenti Donald Tramp arasındakı münasibətlə bağlı verdiyi açıqlama ilə gündəmə gəlib. Boltonun sözlərinə görə, Putin Trampın ona dəstək verəcəyinə əmindir və bu dəstəyi “Rusiya imperiyasını bərpa etmək” planlarının bir hissəsi kimi görür.
“Putin Trampın beynəlxalq məsələlərə dərin yanaşmadığını bilir və bu zəiflikdən istifadə edərək öz geopolitik ambisiyalarını reallaşdırmağa çalışır,” – deyə Bolton qeyd edib. Qeyd edək ki, Con Bolton Donald Trampın prezidentliyi dövründə onun milli təhlükəsizlik müşaviri olub, lakin 2019-cu ildə vəzifəsindən istefa verərək Trampın xarici siyasətini tənqid etməyə başlayıb.
Con Boltonun açıqlamasını şərh edən Atlas Araşdırmalar Mərkəzsinin rəhbəri Elxan Şahinoğlu Con Boltonun Vladimir Putin və Donald Tramp arasında mümkün siyasi yaxınlıq barədə dedikləri təsadüfi fikirlər deyil. Onun sözlərinə görə, Bolton həm Trampın siyasi xarakterini, həm də Putinin strateji niyyətlərini yaxından bilən insandır:
“Boltonun “Putin Trampın ona dəstək verəcəyinə əmindir” fikri, əslində, ABŞ-nin mümkün yeni administrasiyasının Rusiya siyasətindəki boşluqlara işarədir.Con Bolton Vladimir Putinin hazırda danışıqlara tələsmədiyini, çünki döyüş meydanında üstünlük qazandığını düşündüyünü bildirib. Boltonun sözlərinə görə, mövcud vəziyyət Putinə mümkün sülh danışıqlarında daha çox güzəşt qoparmağa imkan verəcək. Keçmiş müşavir bu siyasətin Rusiyaya qonşu olan digər ölkələr üçün də təhlükəli olduğunu bildirib. Çünki, Putin Ukrayna ilə kifayətlənməyəcək, onun planları daha geniş coğrafiyanı əhatə edəcək. Bolton bu sırada Cənubi Qafqaz, o cümlədən Azərbaycanın adını çəkib. Onun sözlərinə görə, Rusiya Azərbaycan, Gürcüstan və Ermənistan təsir dairəsində saxlamaq istəyir. Con Boltonun söylədiyi kimi, Kremlin Ukrayna müharibəsindən sonra Cənubi Qafqazla bağlı “xüsusi planı” ola bilər. Gürcüstanın hazırda Qərblə münasibətlərində soyuqluq mövcud olsa da, Tbilisi Cənubi Osteyi və Abxaziyaya görə, Kremllə diplomatik münasibətləri bərpa etmək istəmir. Ancaq Rusiya rəsmiləri əlaqələri bərpa etmək məqsədilə Tbilisiyə mesaj göndərməkdə davam edirlər. Ermənistanın baş naziri Nikol Paşinyan Rusiya ilə iqtisadi zəmində bağlı olsa da, hərbi və təhlükəsizlik sahəsində fərqli siyasətə üstünlük verir. Ancaq baş nazir Nikol Paşinyanın ölkə içində mövqeləri getdikcə zəifləyir və əgər Kreml Ermənistanda növbəti parlament seçkisində erməni tərəfdarlarından birini hakimiyyətə gətirə bilərsə, Moskvanın İrəvanı yenidən forpostu halına gətirməsinə heç nə mane olmayacaq. Bu vəziyyətdə Azərbaycan Türkiyə ilə strateji müttəfiqliyi gücləndirməlidir. Digər tərəfdən Nikol Paşinyan Konstitusiyada zəruri dəyişiklik edib Azərbaycanla sülh sazişi imzalayarsa Rusiyanın Cənubi Qafqaza təsirini minimuna endirmək mümkün olacaq və bu halda Boltonun proqnozu doğrulmayacaq”.
