Mayın 21-də Macarıstanın paytaxtı Budapeştdə Türk Dövlətləri Təşkilatının (TDT) Dövlət Başçıları Şurasının qeyri-rəsmi iclası keçirilib. Azərbaycan Respublikasının Prezidenti İlham Əliyev tədbirdə iştirak edib.
Eyni zamanda iclasdan sonra Türk dövlətləri arasında əməkdaşlığın konkret istiqamətləri üzrə praktiki addımlar atılmağa başlandı. Bu müddət ərzində nəqliyyat, enerji, təhsil və mədəniyyət sahələrində ortaq layihələrin icrası və əməkdaşlığın dərinləşdirilməsi istiqamətində müzakirələr aparıldı. Əlaqələndirmə qruplarının yaradılması və strateji planların hazırlanması ilə təşkilat çərçivəsində fəaliyyətin sistemli şəkildə davam etdirilməsi məqsəd qoyuldu.
Siyasi şərhçi Azər Həsrət Sherg.az-a deyib ki, TDT-nin üzv dövlətlərinin başçıları qeyri-rəsmi toplantı üçün müşahidəçi ölkənin paytaxtına yığışır:
"Yəni Macarıstan bu marağı göstərməklə əslində TDT-yə layiq olduğunu növbəti dəfə göstərdi. Həmçinin TDT-nin zirvə görüşləri tez-tez olmalıdır. Dövlət başçılarının bir araya gələrək müzakirə etməsi, qərarlar alması mühümdür. Çünki dünyamız çox sürətlə dəyişir, o cümlədən hadisələr bir-birini əvəzləyir. Eyni zamanda Macarıstanın paytaxt Budapeştdə sözügedən tədbirin keçirilməsi önəmli xarakter daşıyır. Bu mənada iclasda yekun sənədlərin qəbul edilməsi nəzərdə tutulub. TDT-nin qeyri-rəsmi zirvə görüşü qurumun güclənməsinə və dövlətlərin bir sıra məsələlərlə bağlı mövqelərinin dəqiqləşməsinə əlavə töhfə verəcək".
