Türkiyə-İsrail münasibətləri məhdud səviyyədə davam edir və tərəflər arasında diplomatik əlaqələrdə soyuqluq müşahidə olunur. 2010-cu ildən əvvəl iki ölkə arasında müdafiə və ticarət sahəsində əməkdaşlıq mövcud olsa da, sonrakı dövrdə bu münasibətlər zəifləyib.
Bu çərçivədə, Türkiyə Xarici İşlər Nazirliyi İsrail parlamentinin işğal altındakı İordan çayının qərb sahilini ilhaq etmək cəhdinə münasibət bildirərək, bu addımı beynəlxalq hüquqa zidd və regionda sabitliyi pozan hərəkət kimi qiymətləndirib. Nazirlik, həmçinin, Türkiyənin Fələstin xalqının hüquqlarını və paytaxtı Şərqi Qüds olmaqla müstəqil Fələstin dövlətinin yaradılmasını dəstəkləməyə davam etdiyini vurğulayıb.
Türk xarici siyasət üzrə ekspert Aydın Sezer Sherg.az-a açıqlamasında İsrail-Türkiyə münasibətlərinin əvvəllər müsbət halda olduğunu, indi isə mənfiyə doğru getdiyini bildirib:
"Türkiyə bu tip açıqlamaları sadəcə açıqlama xatirinə verir. Bundan əmin ola bilərsiniz. Çünki Türkiyə-İsrail münasibətləri, təəssüf ki, donmuş vəziyyətdədir. Hazırda İsraildə səfirimiz yoxdur. Çox ciddi problemlər və çətinliklər yaşanır, qarşılıqlı dialoq da mövcud deyil. Buna görə də Türkiyənin bu ümumi ifadələrlə İsraili qınaması və beynəlxalq hüquq baxımından onun atdığı addımları tənqid etməsi, təəssüf ki, praktik baxımdan heç bir əhəmiyyət kəsb etmir. Bunu təəssüflə qeyd edirəm. Halbuki, Türkiyə-İsrail münasibətləri 2010-cu ilə qədər çox yaxşı səviyyədə idi. Müdafiə sahəsində əməkdaşlıq mövcud idi, hətta İsrail pilotları Konyada təlim keçirdilər. Ticarət əlaqələri də çox əhəmiyyətli idi. Buna görə də Türkiyənin İsraildə sözü keçirdi, müəyyən çəkisi və təsiri var idi".
Ekspert bu münasibətlərin kəsilməsi nəticəsində Türkiyənin Qəzzə və Fələstindəki insanlara da yardım göstərə bilmədiyini söyləyib:
"Türkiyə sadəcə maddi baxımdan-dərman, qida, geyim və səhiyyə kimi sahələrdə yardım edə bilir. Onun xaricində İsrail üzərində siyasi təzyiq göstərmək imkanına malik deyil. Bu səbəbdən, sadəcə ümumi xarakterli açıqlamalarla hadisələri izləyir. Bu isə demək olar ki, hər bir ölkənin edə biləcəyi klassik bir açıqlamadır".
