Türkiyə Prezidenti Rəcəb Tayyib Ərdoğan ABŞ Senatının qondarma “erməni soyqırımı”nı tanımasına sərt reaksiya verib. Prezident tarixdə “erməni soyqırımı” kimi bir hadisənin baş vermədiyini, bununla bağlı arxivdə faktların yer almadığını bildirib: “ABŞ Senatının 1915-ci ildə Osmanlı İmperiyasında baş verən olayları “soyqırım” kimi tanımasına cavab olaraq, biz də Amerika müstəmləkəsi dövründə hinduların soyqırımını tanıya bilərik. Həmin hadisələrlə əlaqədar bir milyondan çox sənəd açdıq. Gəlsinlər, oxusunlar.
Biz əllərimizdəki sənədlər əsasında danışırıq. Parlamentimizin eyni qərarları ilə sizə cavab verə bilərik. Bunu da edəcəyik. Amerika haqqında danışarkən hindular haqqında susmaq mümkündürmü? Bu, ABŞ üçün utancverici bir səhifədir”. Ərdoğan sanksiyalar və təzyiqlər davam edəcəyi təqdirdə İncirlik hərbi bazasının bağlana biləcəyini də istisna etməyib. Pentaqon Türkiyə prezidentinin təhdidini cavabsız qoymayıb. Vaşinqtondan bildirilib ki, ABŞ Türkiyənin hərbi bazalarını, o cümlədən İncirlik aviabazasını yalnız Ankaranın icazəsi ilə istifadə edir: “Biz Türkiyədəki qüvvələrimizin statusunu NATO üzrə müttəfiqimizlə əməkdaşlığımıza və onu qorumağa bağlılığımızın simvolu kimi görürük. Türkiyəni daha konstruktiv siyasət yürütməyə və bu münasibətləri qorumağa çağırırıq”.
Tural Abbaslı: “ABŞ işğal etdiyi hazırkı torpaqlarda yerli hindulara, Vyetnam xalqına qarşı soyqırım etmişdi, ancaq buna görə heç kimə hesab vermədi”
İki NATO üzvünün bir-birini təhdid etməsinə münasibət bildirən Ağ Partiya başqanı Tural Abbaslı deyib ki, Amerikada ikihakimiyyətlilik hökm sürür. Partiya sədrinin sözlərinə görə, Donald Tramp prezident seçildikdən sonra Ağ Ev və Pentaqon arasında qarşıdurma var və gündən-günə dərinləşir:
“Dəfələrlə olub ki, ABŞ prezidenti ilə Amerikanın başqa hakim orqanlarının fikirləri bir-birini təkzib edib. Hətta şəxsən Türkiyə Prezidenti Ərdoğana münasibətdə Trampla Pentaqon arasında köklü fərqlər var. Odur ki, bu günlərdə saxta erməni “soyqırımı” ilə bağlı sənədin qəbulu təəccüblü deyil. ABŞ-dakı güc mərkəzlərinin bu sənədi qəbul etdirməkləri məsələnin bitməsi anlamına gəlmir. Tramp belə əsassız və qondarma məsələyə görə regionda, nisbətən isə dünyada gücə çevrilən Türkiyə ilə münasibətləri korlamaz. Onun bu sənədi təsdiqləyəcəyinə inanmıram”.
Analitikin sözlərinə görə, Türkiyə Cümhuriyyəti ona və onun şanlı tarixinə qarşı hörmətsiz yanaşan bu sənədi cavabsız qoymamalıdır: “İstər ABŞ, istərsə də bütün dünya anlamalıdır ki, Türkiyə ona qarşı haqsızlıqlara adekvat cavab verə biləcək gücdədir”.
T.Abbaslının fikrincə, Tramp bu sənədi təsdiqləsə belə, Türkiyə üçün heç nə dəyişməyəcək:
“ABŞ işğal etdiyi hazırkı torpaqlarda yerli hindulara, Vyetnam xalqına qarşı soyqırım etmişdi, ancaq buna görə heç kimə hesab vermədi. Türkiyə niyə törətmədiyi hadisəyə görə cavab verməlidir? Bu məsələdə Türkiyənin dünya qarşısında baş dik, alnı açıqdır. Tarixi saxtalaşdırmaq baş tutmaz. ABŞ Türkiyə ilə münasibətləri korlamaq istəmirsə, belə ucuz və provakativ addımlardan çəkinməlidir”.
