Rus sülhməramlıları anti-terror əməliyyatlarına mane ola bilməz
“Qarabağda Azərbaycan Ordusunun mövqelərini intensiv atəşə tutan silahlı erməni birləşmələrinin sonu yaxınlaşır”. Bu sözləri “Şərq”ə açıqlamasında politoloq Məhəmməd Əsədullazadə deyib. Analitik bildirib ki, Ermənistan öz silahlı qüvvələrini buradan çıxardıqdan sonra “müdafiə ordusu” adı altında terrorçu qüvvələrin saxlanılacağını deyir.
Ekspertə görə, əgər bu baş verərsə, terrorçu qüvvələrə qarşı anti-terror əməliyyatı keçirmək Azərbaycanın legitim hüququ olacaq: “Anti-terror əməliyyatına Rusiya sülhməramlı qüvvələri mane ola bilməz. Üçtərəfli sazişin müddəti bitdikdən sonra Rusiya sülhməramlı qüvvələri Qarabağdan çıxmağa məcbur olacaq.
Azərbaycan situasiyanı ona uyğun idarə etməlidir. Ermənistan silahlı qüvvələrinin qalıqları torpaqlarımızdan çıxacaqsa, başqa ad altında yeni silahlı birləşmələrin qalması Azərbaycanın suverenliyi və təhlükəsizliyi üçün təhdiddir. Separatçıların lideri Araik Arutyunyan da yolun sonuna çatdığının fərqindədir.
Onun Qarabağı tərk edəcəyi, hakimiyyətə qarşı müxalif qüvvələrə qoşulacağı gözlənilir. Reallıq odur ki, Qarabağda situasiya nə Cənubi Osetiya, nə də Abxaziyaya bənzəyir. Rusiya burada qala bilməyəcək”.
