"Pakistan İslam Respublikası ilə Azərbaycan Respublikası arasında siyasi-diplomatik, iqtisadi-ticari, hərbi və müdafiə, mədəni və humanitar sahələrdə münasibətlər daha da inkişaf edir, dərinləşir".
Bunu "Sherg.az"a açıqlamasında Milli Cəbhə Partiyasının sədr müavini Tural İrfan deyib.
Ekspert bildirib ki, yeni perspektivlər və strateji hədəflər var:
"Hər iki ölkə arasındakı əlaqələrin davamlı yenilənməsinə, mövcud siyasi, iqtisadi duruma uyğun münasibətlərin, qarşılıqlı təkliflərin müzakirəsinə ehtiyac var. Pakistan prezidenti Şahbaz Şərif hazırda Azərbaycanda rəsmi səfərdədir. Əsasən, iqtisadi əməkdaşlıq sahəsində yeni ticarət marşrutlarının açılması və investisiya imkanlarının artırılmasıyla bağlı münasib addımların atılması zərurəti yaranıb . Enerji, kənd təsərrüfatı və sənaye sahələrində birgə layihələrin həyata keçirilməsi hər iki ölkənin iqtisadi inkişafına müsbət təsir göstərə bilər. Eyni zamanda hərbi sahədə, müdafiə sənayesi, birgə təlimlər və strateji layihələr vasitəsilə əməkdaşlığın gücləndirilməsi də əsas hədəflərdəndir".
Analitik vurğulayıb ki, Pakistan hər zaman Azərbaycanın ərazi bütövlüyünü dəstəkləyib, 44 günlük Vətən müharibəsi dövründə də ölkəmizə hərtərəfli dəstəyini əsirgəməyib:
"Mədəniyyət və təhsil sahəsində də əlaqələrin genişlənməsi, tələbə mübadiləsi və humanitar layihələrin artırılması da vacib amillərdəndir. Pakistanın müsəlman ölkəsi olaraq, həm də Türkiyə Cümhuriyyəti ilə sıx dostluq, qardaşlıq əlaqələri eyni zamanda bir çox məsələlərdə üçtərəfli əlaqələrin də inkişafını, harmoniyasını tarazlayır. Hesab edirəm ki, bu kimi amillər ölkələrimizin strateji əhəmiyyətini artıraraq həm regionda, həm də dünyada sülhə, sabitliyə xidmət edəcək, qarşıda duran məsələlərin həllinə töhfə verəcək. Son zamanlar pakistanlı turistlərin də ölkəmizə axını artıb. Ölkəmizdən də Pakistana turist səfərlərinin səmərəli təşkili və bu sahəni daha da əhatəli etmək üçün turizm sahəsində də yeni işlər görülməlidir".
