Azərbaycanın xarici işlər naziri Ceyhun Bayramov Keniyaya rəsmi səfəri çərçivəsində bu ölkənin Prezidenti Villiam Samoei Ruto tərəfindən qəbul edilib.
Bu barədə Azərbaycan Xarici İşlər Nazirliyi məlumat yayıb.
Bildirilib ki, görüşdə iqtisadiyyat, ticarət, təbii sərvətlər, təhsil, turizm və digər sahələrdə əməkdaşlığın perspektivləri müzakirə edilib.
Qarşılıqlı yüksək səviyyəli səfərlərdə və əlaqələrdə son dinamika, həmçinin regional və beynəlxalq çərçivədə əməkdaşlığın gücləndirilməsi məmnuniyyətlə qeyd edilib.
Azərbaycan XİN başçısı həmçinin münaqişədən sonrakı regional vəziyyət, Azərbaycanın yenidənqurma və sülh gündəliyi barədə qarşı tərəfi məlumatlandırıb.
Millət vəkili Ceyhun Məmmədov Sherg.az-a bildirib ki, Azərbaycan son illərdə Afrika ölkələri ilə olan əlaqələrini əhəmiyyətli dərəcədə inkişaf etdirir:
"Bu gün Azərbaycanla Afrika dövlətləri arasında siyasi, iqtisadi və mədəni sahələrdə çoxşaxəli, sıx münasibətlər mövcuddur. Hər iki tərəf bu əməkdaşlığın daha da genişlənməsi və möhkəmləndirilməsi üçün ciddi səylər göstərir. Bu çərçivədə Afrika ölkələrinin bir çox yüksək səviyyəli nümayəndə heyətləri Azərbaycana rəsmi və işgüzar səfərlər həyata keçiriblər. Bu səfərlər həm qarşılıqlı anlaşmanın dərinləşməsinə, həm də ortaq maraqlara əsaslanan əməkdaşlıq imkanlarının araşdırılmasına şərait yaradıb. Azərbaycan və Afrika ölkələri arasında qurulan bu əməkdaşlıq platforması bir sıra mühüm sahələri – ticarət-iqtisadi əlaqələri, siyasi dialoqu, mədəni mübadilələri, təhsil və humanitar təşəbbüsləri əhatə edir. İki tərəf arasında həyata keçirilən ortaq layihələr və təşəbbüslər, qarşılıqlı faydalı münasibətlərin gələcəkdə daha da güclənəcəyini göstərir. Bu cür əməkdaşlıq Azərbaycanın beynəlxalq aləmdə nüfuzunun və mövqeyinin daha da güclənməsinə, eləcə də ölkəmizin qlobal siyasi və iqtisadi proseslərdə daha fəal iştirakına təkan verir".
Parlamentari əlavə edib ki, bu münasibətlərin dərinləşməsi Afrika ölkələri ilə qarşılıqlı hörmətə və bərabərhüquqlu tərəfdaşlığa əsaslanan əlaqələrin inkişafında mühüm rol oynayır:
"Nəticə etibarilə, Azərbaycanla Afrika ölkələri arasında yaranan bu yaxın münasibətlər ölkəmizin dayanıqlı inkişafına, beynəlxalq əməkdaşlıq potensialının genişlənməsinə şərait yaradır".
Fidan Fərhad
