“...Bu gün Qırğızıstan Rusiya oxu ətrafında yaşamaqdadır” - ŞƏRH

Turan 12:09 08.08.2019 Siyasət 1134

“2000-ci illərin əvvəlindən başlayaraq, Amerikanın beyin mərkəzləri və müxtəlif fondları sayəsində keçmiş sovet respublikalarından üçündə - Ukraynada, Gürcüstanda və Qırğızıstanda hakimiyyət çevrilişləri baş verib”.

Bunu “Sherg.az”a açıqlamasında Bakı Politoloqlar Klubunun rəhbəri, siyasi elmlər doktoru Zaur Məmmədov deyib.
Analitik bildirib ki, sonrakı hadisələr hakimiyyət dəyişikliklərinin əslində həmin ölkələrin xalqlarının yox, Vaşinqtonun maraqlarının reallaşdırılması üçün lazım olduğunu göstərdi:

“Beləliklə demokratiya, azad söz şüarları, rüşvətxorluğa qarşı mübarizə, iqtisadi inkişaf devizləri adı altında Vaşinqton Moskva üzərində 1-0 qələbə çaldı. Ancaq üç ölkənin heç birində nə iqtisadi artım, nə sosial sahədə irəliləyiş oldu.
Əvəzində siyasi sabitsizlik, anarxiya və cəmiyyət daxilində qütbləşmə daha da artdı. Qırğızıstanda hər dəfə kürsüdən uzaqlaşan demokrat liderlərə qarşı məhkəmə hökmləri və həbs qərarları gündəmə gəlir. Ukraynada oliqarxik-banditizm idatəetməsi daha da irəliləyir.
Gürcüstanda isə xalqın bütün mental və milli dəyərləri əllərindən alınır. Yeri gəlmişkən, Ukraynanı faktiki xaosa çevirən Qərb və Rusiya, qarşıdakı iki il ərzində Gürcüstanı daha da betər duruma salacaq. Nəticə etibarı ilə bu gün Qırğızıstan Rusiya oxu ətrafında, Gürcüstan və Ukrayna isə siyasi hakimiyyətdə kimin olmasından asılı olaraq Rus-Amerikan yumruğu altında yaşamaqdadır”.
Politoloqun fikrincə, dünyanın güc mərkəzləri arasında sərt və mürəkkəb mübarizənin getdiyi bir dövrdə Prezident İlham Əliyevin apardığı xarici siyasət əksər dövlətlər üçün örnək rolunu oynaya bilər:
“Region ətrafında baş verən hadisələr bir daha göstərir ki, rəsmi Bakının həyata keçirdiyi müstəqil daxili və xarici siyasət kursu xalqımızın milli maraqlarının reallaşdırılması və dövlətçiliyimizin inkişafını təmin edən ən optimal variantdır. Azərbaycan Qafqaz regionunda və Yaxın Şərqdə mühüm oyunçudur.
Bu, MDB-də yeganə uğurlu çoxvektorlu xarici siyasət aparan dövlət nümunəsidir. Keçmiş SSRİ respublikalarından heç birinə həm Rusiya, həm Avropa İttifaqı və ABŞ-la, həm də İsrail və İranla paralel münasibət qurmaq müyəssər olmayıb. Azərbaycan Şərq-Qərb ticarət, enerji-yanacaq və nəqliyyat-kommunikasiya əlaqələrinin mərkəzində dayanır. Bu mövqe getdikcə güclənir.
Azərbaycan dünyanın həm alternativ enerji təminatçısı, həm də əsas tranzit ölkə kimi qəbul edilir. Məhz ölkəmizin uğurlarının nəticəsidir ki, son aylar ərzində Azərbaycana qarşı müxtəlif xarici vektorlar tərəfindən istər bilavasitə, istərsə də, kiçik qonşularımız vasitəsi ilə artan pressinqin şahidiyik.
Bölgədə və qonşu regionlarda baş verən prosesləri nəzərə alaraq biz bir xalq kimi ayıq olmalıyıq. Həmin güclər bilməlidirlər ki, Azərbaycanda xalq-Prezident arasında olan sıx birlik və vəhdət bu kimi mərkəzlərin arzularını puç edir”.