Amerika Birləşmiş Ştatları Azərbaycan və Ermənistan arasında sülh razılaşmasına nail olmaq üçün fəaliyyətini davam etdirir. Bunu ABŞ Dövlət Departamentinin mətbuat katibi Metyu Miller keçirdiyi brifinqdə deyib. Miller bldirib ki, Ermənistan və Azərbaycan sülh sazişi istiqamətində mühüm irəliləyişləri davam etdirirlər. Biz bu prosesi dəstəkləməyə sadiqik. Qeyd edək ki, bir neçə gün əvvəl Böyük Britaniya hökuməti Londonda Azərbaycan və Ermənistan rəhbərliyini görüşdürmək təşəbbüsü göstərsə də, Baş nazir Nikol Paşinyan görüş və müzakirədən qaçıb.
Politoloq Məhəmməd Əsədullazadə "Sherg.az"a deyib ki, Azərbaycan və Ermənistan liderlərinin Londonda görüşünün baş tutmaması əsasən sərhədlərin delimitasiya və demarkasiya prosesində kəskin fikir ayrılıqlarının nəticəsidir. Ekspertin sözlərinə görə, Ermənistan Almatı Bəyannaməsindən irəli gələn 1991-ci il sərhədlərini əsas götürür:
"Halbuki Almatı Bəyannaməsi heç də bu xüsusda əsas ola bilməz. İki dövlət arasında sərhədlərlə bağlı dövlətlərarası müqavilə yoxdur. Kəlbəcər və Zəngəzur istiqamətində Ermənistan əlavə təkliflərlə çıxış edir. Məhz bu fikir ayrılıqlarına görə iki dövlət arasında birgə komissiyanın əsasnaməsi təsdiq edilmədi. Ermənistanın ABŞ və Fransa tərəfindən hərbi dəstəyi Paşinyanın əlavə şərtlərlə çıxış etməsinə gətirib çıxarır. Azərbaycana Ermənistanla sülh bir o qədər də vacib deyil. Amma Qərbin geopolitik maraqları sülhün tezliklə əldə edilməsini şərtləndirir. Orta dəhlizin seqmenti olan Zəngəzur yolunun açılması Vaşinqtonun maraqlarına uyğundur. Gürcüstanda Qərb mövqeyinin zəifləməsi Ermənistanın üzərindən orta dəhlizin açılmasını labüd edir".
Ekspertin sözlərinə görə, görüş baş tutsaydı, Zəngəzur yolunun açılması, delimitasiya və demarkasiya prosesində fikir ayrılıqları danışıqlar predmeti olacaq: "Görünür, Ermənistan rəhbərliyi güzəştə hazır deyil. COP29-a kimi çərçivə sazişinin bağlanması sual altındadır. Fransa hər vəchlə sülhün qarşısını alır. Əgər Fransa sülhə imkan verməsə, Paşinyan prosesdən yayınarsa, müxalifətə Rusiyanın dəstəyi artacaq. Rusiya Ermənistanda hakimiyyət dəyişikliyinə nail olarsa, ümumiyyətlə, danışıqlar və sülh prosesi dayana bilər. Rusiya və Fransa Cənubi Qafqazda sülhün əleyhinədir. Ancaq Böyük Britaniyada liderlərin görüşünün baş tutmaması heç də hərbi gərginliyin artmasına gətirib çıxarmayacaq".
