Bu gün Ankarada Türkiyənin xarici işlər naziri Hakan Fidan ilə Rusiyanın xarici işlər naziri Sergey Lavrov arasında görüş keçirilir. Görüşdə əsas diqqət Ukraynadakı münaqişənin həll yollarına, Suriyadakı vəziyyətə və ümumilikdə Yaxın Şərqdəki mövcud gərginliyə yönəlib. Tərəflər həmçinin Rusiya-Türkiyə ikitərəfli münasibətlərini müzakirə edirlər. Xüsusilə enerji, ticarət, müdafiə və turizm sahələrində əməkdaşlıq məsələləri gündəmdədir. Ankara və Moskva arasında qarşılıqlı ticarət həcminin artırılması, eləcə də enerji layihələrinin davam etdirilməsi əsas prioritetlər sırasında yer alır. Lavrovun Türkiyəyə səfəri çərçivəsində gələcəkdə iki ölkə arasında strateji əməkdaşlıq perspektivləri və digər beynəlxalq məsələlər ətrafında da fikir mübadiləsinin aparılması gözlənilir.
Qafqaz Strateji Araşdırmalar Mərkəzinin sədri, politoloq Hasan Oktay “Sherg.az”a bildirib ki, Rusiya xarici işlər naziri Lavrov Hakan Fidanla görüşmək üçün bu gün Ankaraya gələcək və daha sonra İrana gedəcək:
“Beş gün əvvəl Hakan Fidan və Lovrov Cənubi Afrikada görüşüb. İndi isə daha geniş şəkildə Suriya məsələsi, Ukrayna məsələsi və ən əsası İranın gələcəyini müzakirə etmək üçün bir araya gələcəklər. Dekabrın 8-də Əsədin gözlənilmədən Moskvaya getməsi Suriyada ciddi şok yaşatdı. Eyni zamanda Suriyada Rusiya ilə birlikdə İran da məğlub oldu. Halbuki Türkiyə əvvəldən İran və Rusiyadan Əsədlə Türkiyəni barışdırmağı tələb edirdi, hətta son vaxtlar Türkiyə Əsədlə həll yolu axtarırdı. Lakin İran və Rusiya buna müsbət baxmadı və nəticədə regionda hər iki ölkə uduzan, Türkiyə isə hələlik qalib tərəfdir. Digər tərəfdən Ukrayna ABŞ-nin müdaxiləsi ilə yetim uşaq kimi tərk edildi. Amerika və Rusiya xarici işlər nazirləri Səudiyyə Ərəbistanında görüşərkən Zelenski Türkiyəyə gəldi və Türkiyənin bu məsələdə mövqeyi açıq şəkildə ortaya çıxdı. Türkiyə Ukraynanın ərazi bütövlüyünü tanıyacağını bəyan edib və bu Kiyev üçün mühüm dəstəkdir. İki xarici işlər nazirinin Səudiyyə Ərəbistanında baş tutacaq 4-5 saatlıq görüşü indi hamının müzakirəsindədir, gündəmdə təkcə Ukrayna deyil, həm də İranın gələcəkdə necə formalaşacağı, Rusiyanın İranı satıb-sata bilməyəcəyi gündəm mövzusudur. Eyni zamanda Lavrovun əvvəlcə Türkiyəyə gəlib, sonra İrana getməsi Ankarada təkcə Ukrayna və ya Suriyanın deyil, İran mövzusunun da gündəmdə olacağı anlamına gəlir. Türkiyənin İranla bağlı açıq və birmənalı mövqeyi Tehranın ərazi bütövlüyü şəklində özünü göstərir”.
