Bu gün Paşinyanın əsas məqsədi Ermənistanı Qərbə sürükləmək və Qərbin vasitəçiliyi ilə Azərbaycanla münasibətləri həll etməkdir.
Bunu rusiyalı politoloq Sergey Markov deyib.
“Ermənistanın Baş naziri həqiqətən də Bakı ilə münasibətləri yaxşılaşdırmaq istərdi. Amma Ermənistanın ictimai rəyi Paşinyana qarşı “Qarabağı təslim etdin” kimi böyük iddialar irəli sürdüyü üçün Nikol erməni cəmiyyəti və revanşistlərin fikrinə görə Azərbaycana daha güzəştə gedə bilməz. Ona görə də o, mümkün qədər Azərbaycanı günahlandırmağa çalışır, bununla da Qarabağla əlaqədar siyasətindən narazı olanların “hücumunu dəf etməyə” çalışır”, - o bildirib.
Sergey Markovun açıqlamalarını “Sherg.az”a şərh edən tanınmış jurnalist, siyasi şərhçi Fuad Abbasov bildirib ki, Paşinyan 2018-ci ildə hakimiyyətə gələndən bu günə qədər hər zaman qərbyönümlü siyasət aparıb:
“O, Koçaryan və Sarkisyan hakimiyyətindən fərqlənmək üçün ictimai rəyi nəzərə almağa çalışır. Amma buna rəğmən Qarabağı təslim etdiyi iddialar irəli sürülür. Bu haqqda Ermənistan cəmiyyəti düzgün düşünmür. Çünki müharibə zamanı erməni əsgərləri Azərbaycan ordusuna qarşı döyüşmək istəmirdi. Hətta münaqişə dövründə on minlərlə erməni əsgərinin fərari olduğu xəbərləri yayılmışdı. Buda Ermənistan ordusunun onsuz da Qarabağ uğrunda mübarizə aparmaq niyyətinin olmadığını göstərir. İndi bütün günahı Nikol Paşinyanda görməməlidirlər”.
F. Abbasov Paşinyanın daxili təzyiqlərdən çəkinməsinin mümkün olduğunu qeyd edib:
“Hazırda İrəvan höküməti bu səbəbdən sülh müqaviləsinin imzalanma prosedurunu uzatmağa çalışır. Eyni zamanda Azərbaycanın Ermənistandan tələbləri çoxdur. Ermənistan məğlub dövlətdir və qalib tərəfin istəklərini yerinə yetirməyə məcburdur. Bunu ABŞ-nin və ya hərhansı başqa qüvvənin tapşırığı əsasında etməsinin Azərbaycan üçün heç bir fərqi yoxdur. Önəmli olan ən qısa zaman kəsiyində tələblərinin yerinə yetirilməsidir”.
