“Son vaxtlar rəsmi Tehranın bəyanatlarına redaktələr etməsi məhz bununla bağlıdır”
“İkinci bir tərəfdən isə İran indi “ofsaytdır”. O, müharibənin iştirakçısı kimi çıxış edə bilmir və kənarda qalır”
“Eyni zamanda, müharibədən sonra bölgədə geosiyasi formatın dəyişəcəyi məlumdur. O vaxt “zəif bənd”ə çevrilmək İran üçün arzuolunan deyil”
İranın Ali Rəhbəri Ayətullah Əli Xameneyi Dağlıq Qarabağ müharibəsindən danışıb. O qeyd edib ki, Ermənistan işğal etdiyi bütün Azərbaycan ərazilərini Azərbaycana qaytarmalıdır. Ali rəhbərin sözlərinə görə, bununla da Azərbaycan əraziləri işğaldan azad edilməlidir. Ayətullah Əli Xameneyi, həmçinin beynəlxalq sərhədlərə riayət olunmasının zəruriliyini vurğulayıb. Elə isə, “gah nala, gah mıxa vuran” rəsmi cənub qonşumuz nə qədər səmimidir? Hər halda nəzərə almaq lazımdır ki, İranın bəyanatları bir çox hallarda bir-biri ilə ziddiyət təşkil edir. Deməli, hərb dili ilə desək, bu açıqlama da bizi “mina”ya çəkməyə hesablana bilər.
Siyasi analitik Turab Rzayev isə düşünür ki, cənub qonşumuz sözügedən açıqlamaya məcbur idi. O, “Sherg.az”a səbəbləri açıqlayıb:
“Bu, gözlənilən idi. Hər şeydən əvvəl ona görə ki, Azərbaycanın müharibənin taleyini, demək olar, artıq həll etdiyini bütün dünya, o cümlədən İran görür. Biz güc yolu ilə status-kvonu dəyişmişik. Odur ki, rəsmi Tehran Azərbaycan əleyhinə bəyanatların özünə qalacağını bilir. Hərbi əməliyyatlardan sonra bizim yaddaşımızda haqq işimizə mane olan tərəf kimi qalacağını anlayır.
Son vaxtlar bəyanatlarına redaktələr etməsi məhz bununla bağlıdır. İkinci bir tərəfdən isə İran indi “ofsaytdır”. O, müharibənin iştirakçısı kimi çıxış edə bilmir və kənarda qalır”.
T.Rzayev, həmçinin İranın bu mövqeyinə təsir göstərən digər məqamlardan da söz açıb:
“Orada daxili problemlər yaranmaqdadır. Bir tərəfdən iqtisadi-siyasi böhran dərinləşir, digər tərəfdən isə soydaşlarımızın narazılıqları artmaqdadır.
Bildiyiniz kimi, Ermənistana silah daşınmasına İranın şərait yaratması daxili narazılıqlara səbəb olub. Hətta böyük şəhərlərdə, o cümlədən paytaxt Tehranda, Urmiyada, Salmasda ciddi etirazlar baş verir.
Təbriz bazarı, Ermənistanla sərhəd qapısı bağlanıb. Yəni İran gördü ki, onun Azərbaycan əleyhinə mövqeyi heç də xoş qarşılanmır. Eyni zamanda, müharibədən sonra bölgədə geosiyasi formatın dəyişəcəyi məlumdur.
O vaxt “zəif bənd”ə çevrilmək İran üçün arzuolunan deyil. Amma radikal mövqeyi, Azərbaycan və Türkiyə ilə düşmənliyi sayəsində hansısa müsbət nəticəyə nail olmayacağını anlayır. Bəlkə, vaxtında daha adekvat davransa idi, gələcək dünyada mövqeyini təmin edə bilərdi. Lakin indi də gec deyil”.
