"Əgər Avropa İttifaqı Azərbaycan-Ermənistan sülh sazişinin imzalanmasına öz töhfəsini vermək istəyirsə, burada Kallasın görə biləcəyi bir iş yoxdur”
Avropa İttifaqının (Aİ) Xarici işlər və təhlükəsizlik siyasəti üzrə Ali nümayəndəsi Kaya Kallas aprelin 25-də Azərbaycana səfər edəcək. Bu barədə Aİ-nin Xarici əlaqələr və təhlükəsizlik siyasəti ofisindən bildirilib. Qeyd edək ki, 2024-cü il dekabrın 1-dən etibarən Estoniyanın sabiq Baş naziri Kaya Kallas Avropa İttifaqının Xarici işlər və təhlükəsizlik siyasəti üzrə Ali nümayəndəsi vəzifəsinə başlayıb. O, bu postda daha əvvəl həmin vəzifəni icra edən Cozef Boreli əvəz edib.
"Alyans" Strateji Araşdırmalar Mərkəzinin rəhbəri Abutalıb Səmədov "Shereg.az"a deyib ki, Kaya Kallas özündən əvvəlki Cozef Bareldən o qədər də fərqlənməyən bir siyasətçi, diplomatdır. Ekspert vurğulayıb ki, K.Kallasın Azərbaycana səfərində məqsədi də bəlli deyil:
"Əgər Avropa İttifaqı Azərbaycan-Ermənistan sülh sazişinin imzalanmasına öz töhfəsini vermək istəyirsə, burada Kallasın görə biləcəyi bir iş yoxdur. Çünki hər şey, yəni əngəl Ermənistan Konstitusiyasına dirənib. Ermənistan 2027-ci ilə qədər Konstitusiyanı dəyişdirmək, referendum keçirmək istəmir. Burada Kallasın nə rolu ola bilər? Axı onun Ermənistana təsir imkanları yoxdur. Düzdür, Avropa İttifaqı "mülki missiyası"nın Ermənistanda qalma müddəti uzadılıb. Ancaq Paşinyan deyib ki, Ermənistan sülh sazişi imzalanandan sonra missiyanın çıxarılması məsələsinə baxacaq. Kallasın Azərbaycana səfəri də ciddi dəyişikliyə gətirib çıxarmayacaq. Səfər reallaşarsa, daha çox tanışlıq xarakteri daşıyacaq. Ümumi bəyanatlar səslənəcək, sülh istəyi ifadə olunacaq və s. Avropa İttifaqı üçün Cənubi Qafqazda istifadə oluna biləcək dövlət Ermənistandır. Məhz ona görə İrəvanın maraqlarını digər paytaxtlardan üstün tuturlar. Kallasdan Azərbaycanın mənafelərinə uyğun bəyanatlar səsləndirməsini gözləmirik. Gözləntimiz odur ki, ən azından ədalətsiz olmasın, sələfi Borel kimi məsuliyyətsiz bəyanatlar verməsin. Avropa İttifaqı Ermənistana birtərəfli dəstək verməkdən, bu ölkəni silahlandırmaqdan vaz keçməlidir".
