“Azərbaycan və Ermənistan sülh sazişinə çox yaxındırlar. Biz görürük ki, onlar Zəngəzur dəhlizi ilə bağlı razılığa gəlmək üçün yol tapmağa çalışırlar”.
Teleqraf-ın Gürcüstan bürosu xəbər verir ki, bunu ATƏT-in Minsk qrupunun həmsədri və ABŞ-nin Azərbaycandakı səfiri olmuş Metyu Brayza “Independence Avenue Media” nəşrinə müsahibəsində deyib.
Onun sözlərinə görə, Ermənistanın Baş naziri Nikol Paşinyan Azərbaycanın tələbi ilə ölkə konstitusiyasına düzəlişlərin edilməsinə çalışır.
“Bu, çəin mübarizədir. Lakin bunu deməliyəm ki, bir həftə yarım əvvəl yüksək səviyyəli erməni diplomat mənə bildirdi ki, Qarabağ münaqişəsi üzərində 25 ilə yaxındır işləyir və dedi ki, Ermənistan sülh məsələsində heç vaxt bu qədər ciddi olmayıb. Bakıda isə deyirlər: “Biz çox yaxınıq”. Buna görə də bu fonda Zəngəzur dəhlizi ilə bağlı hərəkətlərin müşahidə edilməsi məntiqlidir”, - M.Brayza söyləyib.
Amerikalı diplomat ABŞ şirkətinin Zəngəzur dəhlizini icarəyə götürməsi ilə bağlı səsləndirilən fikirlərə də münasibət bildirib. O deyib ki, dəhlizin 100 il müddətinə Amerika şirkətinə icarəyə verilməsi məsələsi nə Ermənistan, nə də Azərbaycan üçün məqbuldur.
M.Byrayza ABŞ-nin Cənubi Qafqaz üzrə geosiyasi baxışının olmadığını da vurğulayıb.
