Azərbaycan Ermənistanı COP29 İqlim sammitinə dəvət edib.
Bu barədə Azərbaycan Prezidenti İlham Əliyevin xarici siyasət məsələləri üzrə müşaviri Hikmət Hacıyev jurnalistlərə açıqlamasında deyib.
O bildirib ki, İrəvana dəvət göndərilib.
Dəvət qərarı hələ də rəsmi diplomatik əlaqələri olmayan Bakı ilə İrəvan arasında onilliklər boyu davam edən münaqişəyə son qoymaq məqsədi daşıyan sülh prosesi fonunda verilib.
"Muxtar Babayev (COP29-un prezidenti, Azərbaycanın ekologiya və təbii sərvətlər naziri) Ermənistanın xarici işlər nazirinə dəvət məktubu göndərib. Biz rəsmi dəvət göndərmişik. Bunu ilk dəfədir, xarici mediaya deyirəm", - deyə H.Hacıyev bildirib.
O qeyd edib ki, bu məktubun hər iki ölkə arasında rəsmi diplomatik münasibətlər olmadığı bir vaxtda göndərilməsi Azərbaycanın xoşməramlı iradəsinin və inklüziv yanaşmasının göstəricisidir.
H.Hacıyev bildirib ki, COP29 qlobal səydir və həlledici danışıqlar Ermənistan və Azərbaycanın hüdudlarından kənara çıxır.
"İndi Ermənistan hökumətinin qərarvermə vaxtıdır", - deyə Hacıyev bildirib.
Rəsmi Bakının COP29 tədbirinə Ermənistanı qonaq çağırmasını “Sherg.az”a dəyərləndirən politoloq Zərdüşt Əlizadə söyləyib ki, Azərbaycan dünya miqyaslı bu tədbirə Birləşmiş Millətlət Təşkilatına (BMT) üzv olan 193 ölkənin hamısını dəvət edib:
“Hər bir dövlət özü qərar verəcək ki, tədbirdə hansı səviyyədə təmsil olunacaq. Bəzi ölkələrin dövlət başçıları, bəzilərinin isə XİN rəhbərləri və ekologiya nazirləri gələcək. Azərbaycan COP29-un ev sahibi kimi hər kəsə istədikləri səviyyədə təmsil olunmq imkanını verir. Ermənistan təbii ki, COP29 tədbirinə gəlməyi qəbul edəcək. Sadəcə olaraq təmsilçilik səviyyəsini hökümət özü qərar verəcək. COP29 dünya miqyaslı tədbir olduğuna görə ikitərəfli münasibətlərə təsiri yoxdur. Lakin tədbir çərçivəsində müəyyən danışıqlar ola bilər. Məsələn, Londondakı siyasi rəhbərlərin görüşündə İlham Əliyev və Nikol Paşinyan da iştirak etdi. Mahiyyət etibarilə COP29 tədbirindəki görüş də Londondakı kimi heç nə vəd etmir. Ermənistan istər yüksək, istərsə də orta səviyyədə numayəndə ilə tədbirə qatıla bilər. Azərbaycanın beynəlxalq tədbiri keçirən tərəf olaraq hamını dəvət etməsi onun öhdəliyidir”.
Qeyd edək ki, COP29 İqlim sammiti noyabrın 11-dən 22-dək Bakıda keçiriləcək.
