Paşinyan gələcək seçkilərdə ona rəqib ola biləcək şəxsləri çıxdaş etməyə səy göstərir
Ləğv edilmiş separatçı rejimin sonuncu "lider"i Samvel Şahramanyan bu gün Ermənistan İstintaq Komitəsinə çağırılıb və hazırda onun dindirilməsi davam edir. Bu barədə Ermənistan KİV məlumat yayıb. Məlumata görə, Samvel Şahramanyan 44 günlük müharibə ilə əlaqədar “Hərbi qulluqçuların səhlənkarlığı” və “Müharibə vasitələrini düşmənə vermə və ya buraxma” maddələri ilə başlanmış cinayət işi çərçivəsində dindirilir. Onun şahid qismində istintaqa cəlb olunduğu bildirilir. Cinayət işi hələ 2023-cü ildə başlanıb və iki ildən sonra Samvel Şahramanyan ilk dəfə dindirilib.
Politoloq Zərdüşt Əlizadə Sherg.az-a bildirib ki, belə bir məsəl var ki, qələbənin atası çox olur, məğlubiyyət isə yetimdir:
“Heç kəs məğlubiyyəti məsuliyyətini üzərinə götürmək istəmir. Xatırlatmaq lazımdır ki, 1994-ci il müharibəsində Azərbaycan məğlub olduqdan sonra ölkəmizdə uzun müddət məhkəmə prosesi getdi. Nazirlər, polkovniklər, hərbi hissə komandirləri, siyasi partiya nümayəndələrinin bəziləri ittiham olunaraq həbs olundular. Hazırda isə Ermənistan məğlub durumdadır. Nikol Paşinyan Ermənistanın Baş naziri olaraq məsuliyyəti üzərindən atmağa çalışır. O, kiçik səhvləri olan şəxsləri üzə çıxarmaqla öz günahını yüngülləşdirmək niyyətindədir. Ona görə də rəsmi şəxslər müəyyən məsələlərlə bağlı mühakimə olunurlar. Onların bəziləri isə buna görə ölkədən qaçırlar. Məsələn, Ermənistanın keçmiş müdafiə naziri Arşak Karapetyan hazırda Rusiyadadır. Ermənistan ordusu çox səviyyəsiz müharibə apardı. Nikol Paşinyan isə gələcək seçkilərdə ona rəqib ola biləcək şəxsləri çıxdaş etməyə səy göstərir. Bundan sonra keçmiş Qondarma Dağlıq Qarabağ Respublikasının liderlərinin və Ermənistan hərbi-siyasi rəhbərliyinin bir hissəsi də ittiham oluna bilər”.
