Şiştəpədə “Forest school inteqrasiyalı məktəbəqədər təhsil” layihəsinə start verilib.
Sherg.az xəbər verir ki, Azərbaycan Respublikası Elm və Təhsil Nazirliyinin maliyə dəstəyi ilə Şəmkir rayon Q.Allahverdiyev adına Şiştəpə kənd tam orta məktəbində unikal “Forest School İnteqrasiyalı İcmaəsaslı Məktəbəqədər” sinfi fəaliyyətə başlayıb. Bu layihə məktəbəqədər təhsilə yeni bir nəfəs gətirərək, uşaqların təbiətlə iç-içə böyüməsinə imkan yaradır.
Bu sinifdə uşaqlar müvafiq yaşlarına uyğun hazırlanmış kurrikulumdakı məzmunu öyrənməklə yanaşı, meşə və çölçülük praktiki dərsləri də keçirlər. 3-4 yaşlı uşaqlar burada meşə və çöl şəraitində diqqət etməli olduqları məsələləri öyrənir, bu şəraitdə çadır düzəltmək, ocaq qalamaq, cəhətləri tapmaq kimi bacarıqlara yiyələnirlər. Bu təcrübə uşaqların həm fiziki, həm də zehni inkişafına müsbət təsir göstərir, onların təbiətə olan sevgisini artırır və ətraf mühitə daha həssas olmağa sövq edir.
Bu layihə təkcə Şiştəpə kəndi üçün deyil, bütün ölkə üçün bir yenilikdir. “Meşə Məktəbi” uşaqların təbiətlə təmas quraraq öyrənməsi, onların özünə inam hisslərinin güclənməsi və müstəqil düşünmə qabiliyyətlərinin inkişafı üçün böyük imkanlar yaradır. Layihənin uğuru gələcəkdə digər bölgələrdə də bu cür məktəblərin açılmasına zəmin yarada bilər.
Layihə Azərbaycan Respublikası Elm və Təhsil Nazirliyinin maliyə dəstəyi ilə həyata keçirilir. Layihənin rəhbəri Şəmkir şəhər Məhəmməd Füzuli adına tam orta məktəb-liseyin Azərbaycan dili və ədəbiyyat müəllimi Zamanova Səkinə, uşaqların tərbiyəçi müəllimi Hacıyeva Leyladır. Layihənin həyata keçirilməsində yerli icma da yaxından iştirak edir.
