Azərbaycan Respublikası Dövlət Turizm Agentliyinin və Əmək və Əhalinin Sosial Müdafiəsi Nazirliyinin tabeliyindəki Dövlət Məşğulluq Agentliyinin birgə əməkdaşlığı ilə turizm potensialı yüksək olan kəndlərdə turizm üzrə fəaliyyətin dəstəklənməsi və özünüməşğulluğun artırılması məqsədilə kənd qonaq evlərinin müvafiq avadanlıqlarla təmin edilməsi üzrə “Turistik Kənd” layihəsinə start verilib.
Layihə üzrə yerli və xarici turistlər üçün alternativ yerləşmə yerlərinin yaradılması ilə kənd turizminin inkişafı, eləcə də yerli icmaların və turizm fəaliyyəti ilə məşğul olan ailə təssərrüfatlarının rifahının yaxşılaşdırılması hədəflənir.
İlkin olaraq turizm potensiallı Qusar rayonunun Ləzə kəndi, Qax rayonunun İlisu və Sarıbaş kəndlərində icra olunacaq layihə çərçivəsində ümumilikdə 20 qonaq evinin “Aqroturizm” zərfi üzrə zəruri avadanlıqlarla təmin edilməsi nəzərdə tutulur.
Qeyd edək ki, “Turistik Kənd” layihəsi Azərbaycan Respublikasının Prezidentinin 22 iyul 2022-ci il tarixli 3378 nömrəli Sərəncamı ilə təsdiq edilmiş “Azərbaycan Respublikasının 2022─2026-cı illərdə sosial-iqtisadi inkişaf Strategiyası”nın Tədbirlər Planından irəli gələn tapşırıqların icrası məqsədilə həyata keçirilir.
Turizm məsələləri üzrə ekspert Əziz Şiriyev "Sherg.az"-a bildirib ki, bu kimi layihələr rayonlarda sosial-iqtisadi inkişafa, əhalinin yaşayış tərzinə böyük təsir edir:
''Məni də layihəyə dəvət ediblər və orada böyük fərəh hissi ilə iştirak edirəm. Ümumiyyətlə, turistik kənd layihələri Kənd Təsərrüfatı Nazirliyinin "Şəhərdən Kəndə" layihəsi çərçivəsindədir. Burada aqrar tədarük, təchizat, Kənd Təsərrüfatı Nazirliyi, Turizm Agentliyi və Ekologiya Nazirliyi iştirak edir. Turizm Agentliyinin digər tenderində regionlar üzrə 7 ədəd idarəçilik orqanizasiyaları mövcuddur. Orada fermerlərə, kənd əhalisinə turizm anlayışının mahiyyəti, qonaqpərvərliyi aşılamaq üçün təlimlər keçilir. Hazırda bununla bağlı yüksək tempdə işlər görülür. Bu da həm regionlarda işsizliyin qarşısını alır, həm də kənd məhsullarının orqanik tanıdılmasına şərait yaradır. Bir sözlə, regionlarda icma turizmi inkişaf edəcək. Layihənin ətrafında gənclər də toplaşacaq. Çünki onlar rəqəmsal dünyanı və sosial medianı daha yaxşı bilirlər".
