Azərbaycanın xarici siyasətində son dövrlərdə müşahidə olunan uğurlar ölkənin beynəlxalq aləmdə mövqelərinin güclənməsinə və diplomatik əlaqələrinin genişlənməsinə səbəb olub. Rəsmi Bakı həm regional, həm də qlobal güc mərkəzləri ilə balanslı və praqmatik siyasət yürüdərək mühüm tərəfdaşlıqlar qurmağa nail olur. Xüsusilə, Çin Xalq Respublikası ilə qurulan hərtərəfli strateji tərəfdaşlıq münasibətləri Azərbaycanın “Bir Kəmər, Bir Yol” təşəbbüsündə önəmli tranzit və iqtisadi mərkəzə çevrildiyini göstərir. Eyni zamanda, son aylarda İranla münasibətlərdə müsbət dinamika müşahidə edilir. Yüksək səviyyəli təmaslar, qarşılıqlı səfərlər və iqtisadi əməkdaşlıq niyyətləri ikitərəfli əlaqələrin sabit xətt üzrə inkişaf etdiyini göstərir. Bununla yanaşı, Avropa İttifaqı və ABŞ-la münasibətlər də konstruktiv platformada inkişaf edir. Enerji təhlükəsizliyi, nəqliyyat dəhlizləri və regional sabitlik mövzularında əməkdaşlıq Azərbaycanın Qərb tərəfdaşları ilə qarşılıqlı maraqlara əsaslanan əlaqələrini möhkəmləndirir. Bu uğurlar Prezident İlham Əliyevin rəhbərliyi ilə həyata keçirilən çoxvektorlu xarici siyasətin nəticəsi kimi dəyərləndirilir və Azərbaycanın beynəlxalq nüfuzunun artmasında mühüm rol oynayır.
Politoloq Taleh Əliyev Sherg.az-a bildirib ki, Azərbaycanın xarici siyasəti balanslı, çoxşaxəli və milli maraqlara əsaslanan praqmatik yanaşması ilə seçilir:
“Azərbaycanın son illər artan geosiyasi rolu, Cənubi Qafqazda aktiv siyasi prosesləri izləyən Amerika və Pekindən Londona uzanan “Bir Kəmər, Bir Yol” layihəsinin müəllifi Çinlə münasibətlərin işgüzar səviyyədə yüksəlməsinə təkan verib. Azərbaycanın Amerika və Çinlə münasibətləri qarşılıqlı maraqlara və strateji məqsədlərə əsaslanır. Baxmayaraq ki, İran strateji olaraq Azərbaycanla dost ölkələr sırasında deyil, rəsmi Bakının yüksələn regional və beynəlxalq nüfuzunu nəzərə alan praqmatik İran siyasətçiləri ölkəmizlə normal münasibətlərin qurulmasında maraqlı görünür. Çünki Amerikanın və İsrailin Tehran hakimiyyətinə qarşı sərt ritorikası İranı sərhədyanı ölkələrlə, öz aləmində, neytrallaşdırma siyasəti aparmağa vadar edir. Yəni İran çalışır ki, qonşu ölkələr gələcəkdə İsrail və Amerikanın İrana qarşı mümkün hərbi əməliyyatlarında onlarla əməkdaşlıq etməsinlər. Əvvəllər İran region ölkələrini bu siyasətdən təhdid dili ilə çəkindirməyə çalışırdı. Daha sonra bu yanaşmanın faydasız olduğunu anlayaraq, təhdid siyasətini əlində saxlamaqla yanaşı, qonşu ölkələrlə əlaqələri mümkün qədər inkişaf etdirməyə yönəlib”.
