Fevralın 4-də saat 08:10 radələrində Ucar rayon Rəstəcə kənd tam orta məktəbinin 9-cu sinif şagirdi öz sinif yoldaşına xəsarət yetirib.
Ucar rayon sakini çoxsaylı kəsilmiş-deşilmiş yaralar diaqnozu ilə fevralın 4-də Ucar Rayon Mərkəzi Xəstəxanasının Təcili və Təxirəsalınmaz Tibbi Yardım şöbəsinə hospitalizasiya edilib.
Bu barədə TƏBİB-dən bildirilib.
Məlumata görə, ilkin tibbi yardım göstərildikdən sonra o, ixtisaslaşmış tibbi yardım alması üçün Göyçay Rayon Mərkəzi Xəstəxanasına təxliyə olunub. Pasient xəstəxananın cərrahiyyə şöbəsinə yerləşdirilərək əməliyyat edilib. Vəziyyəti stabil qiymətləndirilən vətəndaş fevralın 5-də ambulator müalicə üçün evə buraxılıb.
Psixoloq Samirə Bağırova “Sherg.az”a bildirib ki, uşaqlarda yeniyetməlik çağı şəxsiyyətin parçalanması, əsl kimliyin üzə çıxması mərhələsidir:
“Yeniyetməlik dövründə uşaqlıqdan yığılmış şüuraltı travmalar varsa, üzə çıxmağa başlayır. Hətta bu səbəbdən yeniyetmələrdə aqressivlik, özünə qapanmalar, özgüvənsizlik və sairə kimi psixoloji pozuntular özünü büruzə verir. Üstəlik problemli ailədə böyüyürsə, sağlam olmayan dost çevrəsi varsa bütün bunlar bir uşağı kriminala sürükləyən tətikləyici təkanlardır. Çünki bir çox oğlan yeniyetmələrin düşüncəsinə görə bıçaq gəzdirmək, siqaret çəkmək kimi davranışlar güclülük, “hörmətli oğlan” və sanki artıq kişiləşmə göstəricisidir. Buradan isə aydın olur ki, övlad valideyn münasibətlərinin təməli yanlış qurulub. Eləcə də gündəlik həyatda medianın tez- tez yaydığı kriminal hadisələr uşaqlarda şüuraltı təsirlərini buraxır. Həqiqətən sağlam cəmiyyət yetişdirmək üçün, televiziyadan tutmuş, ailənin içinə kimi hər kəs dəyişməlidir. Uşaqlar böyükləri təqlid edən gələcək nəsildir”.
