Yazın gəlməsinə baxmayaraq, son günlər ölkəmizdə havalar soyuq və yağışlı keçir.
Hətta bəzi ərazilərdə Leysan, dolu və qar müşahidə edilib.
Hava şəraitinin pis keçməsi isə sözsüz ki, kənd təsərrüfatına təsirsiz ötüşmür. Bu cür hava şəraiti kənd təsərrüfatına necə təsir edəcək?
Məsələ ilə bağlı "Sherg.az"a açıqlama verən kənd təsərrüfatı üzrə mütəxəssis Vahid Məhərrəmov bildirib ki, indi bəzi ağacların çiçəklənmə və mayalanma dövrüdür:
“Bitkilərin immun sistemi möhkəmdirsə, intensiv yağışların yağması ona çox da təsir etmir. Mayalanma dövrü 10-14 gün ərzində olur. Sonrakı etaplar isə havadan asılıdır. Getdikcə hava da yaxşılaşır. Düşürəm ki, ağacların mayalanma dövrü normal başa çatacaq. Düzdür, bəzi rayonlarda intensiv küləklər ağacların budaqlarının qırılmasına səbəb oldu və müəyyən problemlər yaratdı. Azərbaycanda kənd təsərrüfatı istehsalında yağışlı havaların yağması bəzi kəndlərdə problemə səbəb olub. Yəni bəzi evlər, təsərrüfatlar su altında qalıb. Ancaq məhsulun nə qədər olacağı bundan sonrakı etaplarda bəlli olacaq. Əgər hava çox isti və quraqlıq olarsa məhsularlığa ciddi şəkildə təsir edəcək. Bütün hallarda Azərbaycan şəraitində məhsulun bol olması fermerlərdən asılıdır. Çünki fermer aqrotexniki qaydalara vaxtında əməl edərsə, torpaqda mineral elementlərin normaya uyğun olması üçün lazimi qədər gübrə verərsə, vaxtında suvarmanı təşkil edərsə və zərərvericilərə mübarizə tədbirini apararsa, məhsuldarlıq artar və ciddi problem yaranmaz. Bunlara əməl edilməsə, quraqlıq olsa, məhsuldarlığı aşağı düşəcək və bazarlarda qiymət artımına gətirib çıxaracaq”.
