Bakının mərkəzində yerləşən universitetlərin köçürülməsi istisna edilmir.
Bunu elm və təhsil naziri Emin Əmrullayev jurnalistlərin suallarını cavablandırarkən deyib.
O qeyd edib ki, bu məsələ layihə və ilkin təkliflər formatındadır: "Universitetlərin köçürləcəyini deyə bilmirik, amma istisna edilmir. Sadəcə bu, asan məsələ deyil. Bakının mərkəzindəki universitetlərdə 20 000 tələbə təhsil alır və üstəlik, nə qədər müəllim var".
Təhsil eksperti Cahid İmanlı "Sherg.az"a bildirib ki, hazırda Azərbaycan Texniki Universitetinin Sumqayıta, Azərbaycan Memarlıq və İnşaat Universitetinin isə Gəncəyə və ya Mingəçevirə köçürülməsi ən perspektivli və düzgün qərar olardı:
“Hər 3 şəhərdə "universitet təcrübəsi" mövcuddur. Həmçinin, şəhər infrasukturu oralarda əlavə universitetlərin açılmasına imkan verir. Yeni universitetlərin açılması sözügedən şəhərlərin daha da inkişafına səbəb olacaq. Bu isə bizim milli maraqlarımıza uyğundur. Ümumiyyətlə, Bakı ilə yanaşı digər güclü elmi-mədəni potensialı olan mərkəzlərin yaradılması vacibdir. Məsələn, Azərbaycan Dövlət İqtisad Universiteti üçün Ağdamda bütöv bir kompleksin tikintisi daha çox uyğun olardı. Bu, Qarabağ Universitetindən sonra bölgənin sosial, iqtisadi və mədəni inkişafına ən böyük töhfə olardı. Hətta Ağdama hansısa universitet köçürülməsə belə, orada yenə də böyük bir universitetin açılması Azərbaycanın gələcək strateji planlarından biri olmalıdır. Ümumilikdə paytaxtdakı bütün universitetlərin köçürülməsi isə doğru olmaz. Paytaxtdakı universitetlərin Bakı ətrafına köçürülməsi də perspektivli görünmür. Bu yenə də eyni problemlərin sadəcə qismən yer dəyişməsi olacaq”.
