Əgər tərəflərdən biri nikaha məcbur qalırsa, bu artıq ailəli olmaq və biz olmaq demək deyil
İmişlidə qadının qaçırılmasının təfərrüatları məlum olub.
"Unikal"ın əldə etdiyi məlumata görə, qadın məcburi nikaha daxil olmaq üçün qaçırılıb.
Belə ki, oğlan evi qıza elçi düşüb. Qızın ailəsi isə evliliyə razılıq verməyib.
Bu səbəbdən oğlan dostları ilə birlikdə qızı qaçırıb.
Qeyd edək ki, İmişli Rayon Polis Şöbəsinə rayonun Boşçalılar kənd sakini olan bir qadının naməlum şəxslər tərəfindən oğurlanması barədə məlumat daxil olub. Polis əməkdaşları tərəfindən keçirilən tədbirlərlə həmin qadının olduğu “Mercedes” markalı avtomobil Salyan rayonu ərazisində müəyyən edilərək saxlanılıb, əməli törətməkdə şübhəli bilinən Elbrus Cəfərov, Vasif Məmmədov və İlkin Şirinov tutularaq istintaqa təqdim olunublar.
Faktla əlaqədar İmişli RPŞ-də cinayət işi başlanılıb, saxlanılan şəxslər barəsində həbs qətimkan tədbiri seçilib.
Mövzu ilə bağlı "Sherg.az"a danışan sosioloq Lalə Mehralı söyləyib ki, əgər qadın qoşulub getməyibsə, iradəsi əleyhinə nikaha məcbur edilirsə, bu artıq cinayət tərkibli vəziyyət hesab olunur:
“Yəni həmin şəxslərə insan oğurluğuna görə cinayət işi açılacaq. Ümumiyyətlə insanlar buna necə cəsarət edirlər hələ də anlaya blmirəm. Ümumiyyətlə qarşı tərəfin nikaha razı olmadığını bilərək onu məcburi formada oğurlayıb nikaha məcbur etməyi özünə və qarşı tərəfə necə rəva görürlər?. Ailə elə bir müəssisədir ki, orada hər şey qarşılıqlı istək əsasında həyata keçirilməlidir. Əgər tərəflərdən biri nikaha məcbur qalırsa, bu artıq ailəli olmaq və biz olmaq demək deyil. Düşünürəm ki, hüquq mühafizə orqanları bununla bağlı öz işini görəcək. Ümumiyyətlə, bu cür qaçırılma və erkən nikaha məcbur etmə hallarında cərimələnərək azadlığa buraxılırlar. Cəriməni də qohum əqrəba kömək edərək bir yolla ödəyirlər. Xüsusilə erkən nikaha cəlb edilmə vəziyyətində cərimələnməklə yaxasını qurtara bilirsə, bu yola başqası da cəsarət edəcək. Qanunlar həbs imkanını tanıyırsa, elə qanuni yolla həll etmək lazımdır. Ona görə də bu cür vəziyyətlərdə hüquq mühafizə orqanlarının üzərinə böyük məsuliyyət düşür. Elə edilməlidir ki, insan oğurluğu və erkən nikah kimi cinayət törədənlər cərimə ilə yaxasını qurtara biləcəyini düşünməsinlər”.
