Elmi araşdırmalar faydasını təsdiqləyib
Məşhur dizayner Viktoria Bekhem ötən aprel ayında 51 yaşını qeyd etsə də, gənc görünüşünü illərdir davam etdirdiyi nizamlı qidalanma proqramına borcludur.
Sherg.az xəbər verir ki, dörd uşaq anası olan Bekhem 2019-cu ildə “The Telegraph”a verdiyi müsahibəsində dəri sağlamlığını qorumaq üçün gündə 3-4 ədəd avokado yediyini bildirmişdi.
Təbii yağ turşuları və E vitamini ilə zəngin olan avokado, Aralıq dənizi pəhrizinin əsas qidalarından biridir. Mütəmadi qəbul dəriyə nəmlik balansını qorumağa kömək edir, A vitamini hüceyrələrin bərpasını dəstəkləyir. Mütəxəssislər avokadodakı biotinin saç və dırnaq sağlamlığını da yaxşılaşdırdığını vurğulayırlar.
C vitamini və antioksidant tərkibi ilə avokado dəri hüceyrələrini sərbəst radikallardan qoruyur və günəşin zərərli təsirlərinə qarşı müdafiə yaradır. 2010-cu ildə 700 qadın üzərində aparılan bir araşdırma sağlam yağların dəri elastikliyini artırdığını və qırışların azalmasına təsir etdiyini göstərib.
2013-cü ildə dərc edilən başqa bir araşdırmada avokadonun ürək sağlamlığına da müsbət təsir etdiyi məlum olub. Avokado, aşağı şəkər tərkibi və sağlam yağ profili ilə qan lipidlərini tənzimləyir və ürək xəstəlikləri riskini azaldır.
Bununla belə, mütəxəssislər Bekhemın gündə 3-4 avokado yeməsini bir qədər çox hesab edir. Qidalanma üzrə ekspertlər sağlam yağ qəbulunu artırmaq üçün zeytun yağı və ya qoz-fındıq kimi mənbələrdən də istifadəni tövsiyə edirlər.
Qidalanma mütəxəssisi Lily Keeling avokadonun lif mənbəyi olduğunu və həzm sisteminə fayda verdiyini bildirir.
Prof. Franklin Joseph isə Bekhemin Aralıq dənizi pəhrizinə üstünlük verməsinin uzunmüddətli sağlamlıq üçün çox düzgün bir seçim olduğunu deyir. Bu pəhriz ürək-damar xəstəlikləri, insult, 2-ci tip diabet və Alzheimer riskini azaltmaqda effektiv sayılır.
Aralıq dənizi pəhrizi - tərəvəz, meyvə, tam taxıllar, paxlalılar, quru meyvə və zeytun yağı kimi sağlam yağların bol istifadə edildiyi bir qidalanma modelidir. Əsas protein mənbəyi kimi qırmızı ət əvəzinə balıq və toyuq seçilir.
