Son dövrlərdə müşahidə edirik ki, kibercinayətlərin sayında artım mövcuddur. Bu artım, xüsusən də, bank kartlarından edilən oğurluqlarda daha çox müşahidə edilir. Çünki bu ödəniş kartları nağdsız ödənişlər üçün ən geniş istifadə edilən vasitədir.
Artıq neçə ildir ki, dünyanın aparıcı ölkələrində kibercinayətkarlığın bu növü ilə ciddi mübarizə aparılır. Onlayn fırıldaqçılıq olan bank kartlarından pulların oğurlanması son illərdə ölkəmizdə də müşahidə edilməyə başlayıb. Belə ki, pandemiya dövründən əvvəl də mövcud olan bank kartları vasitəsilə onlayn ödənişlər bu dövrdən daha da genişlənmişdir. Bu da öz növbəsində kartlardan pulların oğurlanması hallarının artmasına gətirib çıxarmışdır. Bəs kartdan oğurlanan pulu geri qaytarmaq mümkündürmü?
Sualımızı cavablandıran İnformasiya Texnologiyaları üzrə mühəndis-tədqiqatçı, Azərbaycan Kibertəhlükəsizlik Təşkilatları Assosiasiyasının (AKTA) eksperti Bəhruz Əliyev “Sherg.az”a bildirib ki, Bank kartından pul oğurlanması təhlükəli bir vəziyyətdir, lakin düzgün addımlar atılarsa, oğurlanan məbləğin geri qaytarılması mümkün ola bilər:
"Belə bir vəziyyətlə qarşılaşdıqda ilkin olaraq bu kimi addımları atmaq olar.
Birincisi, kartınızdan icazəsiz əməliyyatlar görəndə dərhal applikasiya vasitəsi ilə kartı bloklayın və bankınızın müştəri xidmətləri ilə əlaqə saxlayın. Bu, əlavə itkilərin qarşısını almaq üçün vacibdir. Banka oğurluq barədə məlumat verərkən əməliyyatın tarixi, vaxtı və məbləği kimi məlumatları özünüzdə hazır saxlayın.
İkincisi, hüquq-mühafizə orqanlarına müraciət edin. Bu, hüquqi prosesin başlamasına kömək edəcək və bankın araşdırmasına dəstək ola bilər.
Üçüncüsü, onlayn əməliyyatlar zamanı təhlükəsiz saytlardan istifadə edin və iki mərhələli identifikasiya (2FA) tətbiq edin.
Dördüncüsü, kartınızın hərəkətlərini müntəzəm olaraq yoxlayın. SMS bildirişlərini aktivləşdirin ki, hər hansı bir şübhəli əməliyyatı dərhal görəsiniz.
Oğurlanan məbləğin geri qaytarılması bankın siyasətindən və araşdırmanın nəticəsindən asılıdır. Dərhal tədbir görmək və bankla əməkdaşlıq etmək, itkilərin qarşısını almaq üçün ən effektiv yoldur. Təhlükəsizlik tədbirlərinə riayət etmək isə belə halların qarşısını almağa kömək edə bilər”.
