“Guya bu təlim onlar üçün təhlükə törədə bilər. İran səfiri ilə görüşün keçirilməsi də bununla bağlıdır”
Ermənistanın müdafiə naziri David Tonoyan İran səfiri Abbas Badaxşan Zouri ilə görüşüb. Görüşdə İranın hərbi attaşesi də iştirak edib. Hər iki tərəf Türkiyə-Azərbaycan hərbi təlimini müzakirə edərək, hərbi məsləhətləşmələr aparıblar.
Ermənistan Türkiyənin Azərbaycanla birlikdə hərbi təlimlər keçirməsini Rusiya və İranın maraqlarına təhdid kimi göstərməyə çalışır. Tovuz hadisələri fonunda dünyanın bir çox ölkələri rəsmi şəkildə Azərbaycana dəstək verdi. Rusiya neytral mövqe sərgilədi, İran isə birmənalı şəkildə Azərbaycanın ərazi bütövlüyü dəstəklədiyini elan etdi. Lakin Ermənistanın müdafiə naziri ilə İran səfirinin görüşü bəzi məqamların aydınlanmasına səbəb olacaq. İranın Ermənistana dəstək verib-verməyəcəyi sual altındadır. Bəs, İran düşmən ölkəyə köməklik göstərərsə, Azərbaycan hansı addımları atmalıdır?
Sualımızı cavablandıran politoloq Sədrəddin Soltan “Sherg.az”a açıqlamasında söyləyib ki, Türkiyə-Azərbaycan təlimləri düşmənə göz dağı əməliyyatıdır. Analitikin sözlərinə görə, Ermənistan Türkiyənin Azərbaycanla keçirdiyi hərbi əməliyyatdan ciddi narahatdır:
“Ataların bir misalı var: “Xain xoflu olar”. Tarixən düşmənlər Türkiyə ilə Azərbaycanın birlik olmasından xoflanıblar. İndi də bu təlimin keçirilməsindən narahatdırlar.
Düşünürlər ki, görəsən, bu iki dövlət təlim keçirib nə edəcəklər? Çünki Ermənistan Azərbaycan və Türkiyəyə qarşı olan bir bölgədir. Ermənistanın müdafiə naziri Rusiyan, ABŞ və Fransanın səfirləri ilə görüşlər keçirdi.
Hər üç ölkə ATƏT-in Minsk Qrupunun həmsədridir. Ermənistan bu görüşdə planlaşdırılmış təlimlərdən narahatlığını ifadə etdi. Guya bu təlim onlar üçün təhlükə törədə bilər. İran səfiri ilə görüşün keçirilməsi isə bununla bağlıdır.
İran bölgə dövlətidir və həm Azərbaycan, həm Türkiyə ilə münasibətləri normaldır.
Ona görə də Ermənistan rəhbərliyi əmin olmaq istəyir ki, Azərbaycan və Türkiyənin hərbi təlimləri onlara hansısa zərər törətməsin”.
