Yanvarın 24-də Bakı-Şuşa-Bakı müntəzəm avtobus marşrutu istifadəyə verilib. Marşrut üzrə 400-ə yaxın bilet satılıb. Bu gün Bakı-Şuşa reysi ilə hərəkət edən ilk sərnişin avtobusu saat 06:30-da Bakıdan yola çıxan ilk sərnişin avtobusu 13:00 radələrində şəhərə çatıb. 44 sərnişin gətirən avtobus keçmiş avtovağzal ərazisində qarşılanıb.
Qeyd edək ki, Bakı-Şuşa-Bakı avtobus reysi həftədə iki dəfə həyata keçiriləcək. Bakıdan Şuşaya avtobus bileti 10 manat 40 qəpikdir. Marşrut xətlərinə bilet satışı onlayn qaydada “Yolumuz Qarabağa” portalı vasitəsilə həyata keçirilir.
Avtobus reyslərinin təşkili ilə bağlı "Sherg.az"a açıqlama verən Millət vəkili Aqil Abbas bildirib ki, hər kəsin ildə bir dəfə səfər edə bilməsi limitinin mövcudluğuna qarşıdır:
"Səfalı torpaq Şuşaya avtobus marşrutlarının təmin edilməyini müsbət dəyərləndirirəm. İnsanlar gedib səfalı torpaqları görəcəklər. Lakin hər kəsin ildə bir dəfə getməsilə bağlı limit qoyulmağına qəti qarşıyam. Bu məhdudiyyət aradan qaldırılmalıdır. Prezident İlham Əliyev deyib ki, gələn il Şuşa sakinləri yurdlarında məskunlaşmağa başlayacaqlar. Onda bu necə nizamlanacaq?".
Deputatın fikrincə, Şuşaya daha çox biletin satılmasına səbəb Qarabağın digər bölgələrinin xarabalığa çevrilməsidir:
"Ağdama və digər yerlərə nisbətən Şuşaya bilet çox satılıb. Çünki Azərbaycanın mədəniyyət paytaxtında həyat var. Şuşa müəyyən dağıntılara məruz qalsa da, özünü qorumağı bacarıb. Orada təmir-tikinti gedir. Ona görə də insanlar Şuşanı görmək istəyirlər”.
Xanlar ƏLİBƏY
