Hikmət Babaoğlu: “Ermənistanın Qafqazda torpaq və kimlik uğrunda mübarizəsi” ermənilərin Cənubi Qafqaza aid olmadığı anlamına gəlir
Almaniyanın “Alman Dalğası” (Deutsche Welle) ictimai yayım qurumu tərəfindən 30 mart 2025-ci ildə yayımlanan “Ermənistanın Qafqazda torpaq və kimlik uğrunda mübarizəsi” adlı verilişdə Ermənistanın tarixi iddiaları müdafiə olunub, Azərbaycanın ərazi bütövlüyünə qarşı fikirlər səsləndirilib.
Sözügedən materialın jurnalistika prinsiplərinə zidd olması və dezinformasiya yayması Azərbaycan ictimaiyyətində geniş etiraza səbəb olub. Xüsusilə Qərbi Azərbaycan İcması verilişi kəskin şəkildə tənqid edərək, onun xalqlar arasında nifrəti qızışdıran məzmun daşıdığını bildirib və beynəlxalq ictimaiyyəti obyektiv mövqe sərgiləməyə çağırıb.
Qərbi Azərbaycan İcmasının İdarə Heyətinin sədr müavini, millət vəkili Hikmət Babaoğlu “Sherg.az”a söyləyib ki, Deutsche Wellenin təqdim etdiyi verilişdə Ermənistanın Qafqazda torpaq və kimlik uğrunda verdiyi mübarizəsi qeyd olunur:
“Hesab edirəm ki, bu hər şeydən öncə jurnalistika standartlarına və suveren dövlətin hüquqlarına zidd verlişdir. Amma Almaniya prezidenti Frank-Valter Ştaynmayerin Ermənistana səfərindən bir gün öncə seperatçı və terrorçu rejimin bayrağını öz səhifəsində paylaşdığını nəzərə aldıqda nə verlişin, nə də paylaşımın təsadüfi olmadığnı görürük. Bunun altında müxtəlif məqsədlər yatır. Əsas məqsəd ondan ibarətdir ki, Ermənistandan sonra Azərbaycana səfər edəcək Almaniya prezidenti Azərbaycan üzərində belə təzyiq formalaşdırmaqla müəyyən güzəştlər qoparmağa çalışacaq. Bu Avropa siyasətinin klassik metodudur. Lakin Azərbaycan öz gücündən və beynəlxalq nüfuzundan istifadə edərək dərhal Almaniyanı üzr istəməyə məcbur etdi. Sözügedən verlişin adında şüuraltı etiraf var. “Ermənistanın Qafqazda torpaq və kimlik uğrunda mübarizəsi” ermənilərin Cənubi Qafqaza aid olmadığı anlamına gəlir. Ermənilər Qafqazda torpaq və kimlik qazanmaq üçün mübarizə aparırlar. Dolayı yolla sözügedən veriliş ermənilərin ifşasıdır. Lakin biz belə yanaşmaları hüquqi olaraq pisləyirik. Çünki həmin verilişdə məqsəd ermənilərin Azərbaycan tərəfindən sıxışdırılaraq təzyiqlərə məruz qaldığı vurğulanmaq istəyib. Almaniya rəsmi olaraq üzr istədiyi kimi jurnalistika sahəsində də bununla bağlı müəyyən addımlar atılmalıdır”.
