Türkiyə Prezidenti Rəcəb Tayyib Ərdoğan yaxın ətrafına Əhməd Davudoğlunun yeni partiyasının “CHP-çı kimi danışdığını” bildirib.
Axar.az xəbər verir ki, bu iddia ilə türkiyəli yazar Əbdülqadir Selvi çıxış edib.
“Görünən odur ki, Davudoğlu Ərdoğanla polemikaya girməkdən qaçmayacaq. AKP-yə yönələn sərt tənqidlərini davam etdirəcək. Əli Babacanın isə polemikaya girməməyə üstünlük verəcəyi söylənilir.
Ərdoğan AKP-ni qurduğu gündən bu yana Ərbakan haqqında tək bir tənqidi söz işlətməyib. Ərbakanı rəhmətlə yad etməyi və hətta həbsxanaya girmə təhlükəsi yarananda keçmiş müəllimini xilas etməyi bacardı. Vəfalı davrandı. Buna görə də Səadət Partiyasının seçicilərinin səsini almağı bacardı.
Yeni partiya quranların və quracaq olanların, müxalifət dilini bu qədər sürətlə mənimsəmələri haqqında Ərdoğanın “CHP ağzıyla danışırlar” dediyi söylənilir”, – deyə o bildirib.
