Ermənistanda keçirilən parlament seçkiləri başa çatdıqdan sonra 10 noyabr 2020-ci il və 11 yanvar 2021-ci il tarixlərində imzalanmış üçtərəfli razılaşmaların icrası aktuallaşdı. Bu məsələ Azərbaycan və Rusiya prezidentləri arasındakı sonuncu telefon danışığı zamanı da müzakirə olunub. Aydındır ki, razılaşmaların həyata keçirilməsi birbaşa Azərbaycan və Ermənistanın ərazi bütövlüyünün qarşılıqlı şəkildə tanınmasından asılıdır. Rəsmi Bakı buna hazırdır, amma İrəvan hələ qərarsızdır. Doğrudur, ilk işarələrdən sezmək olur ki, Nikol Paşinyan Azərbaycanın ərazi bütövlüyünü tanıyan müqaviləyə imza atacaq. İrəvanda dərc edilən “Hraparak” hətta təxmini tarixləri də (sentyabr ayı) qeyd edib.
Maraqlıdır, həqiqətən də Ermənistan sülh müqaviləsini imzalayacaqmı?
Sosial Tədqiqatlar Mərkəzinin Mətbuat Xidmətinin rəhbəri, beynəlxalq məsələlər üzrə mütəxəssis Əziz Əlibəylinin “Sherg.az”a açıqlamasına görə, Ermənistan tərəfi sülh danışıqlarından imtina edir, razılaşmaları yerinə yetirmək istəmir:
“Bunun da bir neçə səbəbi var. Razılaşmalara imza atmaqlarının əsas səbəbi müharibədə məğlub olmaq ilə əlaqədar idi. Faktiki olaraq ziyanın yarısından dönmək istəyirlər.
Çalışırdılar ki, müharibədə daha az zərərə uğrasınlar və az itkilərə məruz qalsınlar. Ona görə də 10 noyab razılaşmasına imza atmışdılar.
Amma 26 İyun Silahlı Qüvvələr günündə Prezident İlham Əliyevin səsləndirdiyi “Erməniləri sülhə məcbur edəcəyik” ifadəsi onu göstərir ki, erməni tərəfi sülh danışıqlarına qayıtmaq niyyətində deyil.
Ümumiyyətlə, prosesdən imtina etməyə çalışırlar. Burada bir neçə detal var: Birinci detal ondan ibarətdir ki, erməni xalqının gözündə müharibənin nəticələrinin təsirlərini azaltmağa çalışırlar.
İkincisi, Cənubi Qafqazda aktorlar dəyişib və erməni tərəfi istəyir ki, Rusiyadan başqa digər oyunçuları prosesə daxil etsin və Azərbaycanla-Türkiyəni təkləsin.
Hazırda Paşinyan hakimiyyəti məhz bu istiqamətdə sülh, dialoq və əməkdaşlıqla bağlı baxışlar sərgiləməkdədir”.
