“Nemezis” terrorçularına qoyulan abidə Ermənistan-Türkiyə münasibətlərində gərginlik yaradıb
Ermənilər terrorçu mahiyyətlərini bir daha ortaya qoydu. Türkiyə ilə münasibətlərin normallaşma mərhələsində paytaxt İrəvanda “Nemezis” terror əməliyyatına həsr olunmuş abidənin açılışını etdilər. Təbii olaraq Azərbaycan və Türkiyə xarici işlər nazirləri İrəvanda “Nemezis” terror əməliyyatına həsr olunmuş abidənin açılışını pislədilər. Vurğulandı ki, terror bəşəriyyət üçün bəla və təhlükədir. Hətta Türkiyə XİN başçısı Mövlud Çavuşoğlu “Nemezis” abidəsinin sökülməsi üçün rəsmi İrəvana xəbərdarlıq etdi.
Qardaş ölkənin xarici işlər naziri bildirib ki, Türkiyə Ermənistanla normallaşma prosesində güzəştlər edib. Onun sözlərinə görə, Ankara bu addımları Azərbaycan-Ermənistan normallaşma prosesinə töhfə vermək üçün edib: “Ermənistanla münasibətlərin normallaşması istiqamətində bəzi jestlər etdik. Məqsədimiz bir tərəfdən münasibətlərin normallaşması, digər tərəfdən Azərbaycan və Ermənistan arasında sülh razılaşmasına töhfə vermək idi. İrəvanda terrorçulara “Nemezis” abidəsinin qoyulması qəbuledilməzdir. Abidənin götürülməsi üçün Ermənistana lazımi müraciətləri göndərdik. Əlavə tədbirlər görməyi də düşünürük”.
"Atlas" Araşdırmalar Mərkəzinin rəhbəri Elxan Şahinoğlu bildirib ki, “Nemezis” terrorçularına qoyulan abidə Ermənistan-Türkiyə münasibətlərində gərginlik yaradıb. Onun sözlərinə görə, halbuki iki ölkə arasında danışıqlarda irəliləyiş əldə edilib və İrəvan sərhədin açılmasına ümidli idi:
"Məlum abidə normallaşma prosesini əngəllədi. Ankara dialoqun uğurla davam etməsi üçün İrəvandan həmin abidənin götürülməsini tələb edib. Ermənistanın Təhlükəsizlik Şurasının katibi Armen Qriqoryan isə bildirib ki, abidənin qoyulması Ermənistanın daxili işidir, yəni götürməyəcəklərinə işarə edib. İkinci Qarabağ müharibəsindən sonra Bakıda Hərbi Qənimətlər Parkının salınması və orada erməni hərbçilərinin maketlərinin yerləşdirilməsi də Azərbaycanın daxili işi idi. Ancaq İrəvanın bundan şikayət etmədiyi, donos yazmadığı beynəlxalq təşkilat və dövlət qalmadı. Həmin maketləri yenidən parka qaytarmaq lazımdır. Ermənilər nə zaman “Nemezis” abidəsini ləğv edərlər, biz də maketləri yığışdırarıq. Unutmayaq ki, erməni terrorçuları 100 il əvvəl Azərbaycanın da tanınmış siyasi xadimlərini qətlə yetiriblər".
