Dekabrın 8-i dövlət sərhədinin Kəlbəcər rayonu istiqamətində Ermənistan silahlı qüvvələrinin növbəti dəfə təxribat törədib. Nəticədə hərbi qulluqçumuz əsgər Əliyev Asif Adil oğlu şəhid olub.
Xatırladırıq ki, dekabrın 15-də Brüsseldə Şərq Tərəfdaşlığı sammiti çərçivəsində Azərbaycan prezidenti İlham Əliyev və Ermənistan baş naziri Nikol Paşinyanın görüşü planlaşdırılıb. Görüş öncəsi Ermənistan atəşkəsi pozmaqla öz məkrli niyyətini ortaya qoydu.
Görünür, Ermənistan ağalarının arxasında gizlənərək “Dəmir yumruq”dan qoruna biləcəyini düşünür. 44 günlük Vətən savaşında erməni hərbçiləri arxalarına baxmadan qaçdıqlarını unutdularmı? N.Paşinyan kapitulyasiya aktını hansı küncdə imzaladığını yaxşı xatırlayar.
Ermənistanın törətdiyi təxribatla bağlı “Sherg.az”a danışan Əməkdar jurnalist, ehtiyatda olan polkovnik-leytenant İbrahim Rüstəmli vurğulayıb ki, problemin əsas səbəbkarı Rusiya sülhməramlılarıdır:
“Bu məsələdə erməni güclərinin özbaşınalığı və hərc-mərcliyi aydın şəkildə görsənir. Digər tərəfdən problemin səbəbkarı Qarabağda yerləşdirilən Rusiya sülhməramlılarıdır. Onlar sülhməramlı missiyanın nədən ibarət olduğunu hələ başa düşməyiblər, ya da başa düşmək istəmirlər. Sülhməramlılar missiyalarını yerinə yetirərkən hərbi və siyasi vəziyyəti dərindən öyrənməli idilər. Sülhməramlı qüvvələrin komandanlarının separatçı qüvvələrin başçıları ilə isti münasibətləri göstərdi ki, sülhməramlılar tərəf tuturlar”.
İ.Rüstəmli qeyd edib ki, konkret addımlar atılmazsa, təxribatlar davam edəcək:
“Bunun qarşısını almaq üçün ilk olaraq sülhməramlılara vəzifələri bir daha xatırladılmalıdı. Həmçinin Azərbaycan Ermənistanla sərhəddə buraxılış məntəqəsi yaratmalı və oradan keçən ermənilərin yoxlanılması məsələsini öz üzərinə götürməlidi. Ermənilər dünyaya konfliktin bitmədiyi mesajını göndərirlər. Onlar hələ dərk etməyiblər ki, Qarabağ problemi həllini tapıb. Üçtərəfli istiqamətdə qazanılmış razılaşmanın statusunu zəiflətməyə çalışırlar”.
Xanlar Əlibəy
