“Laçın” tankerinin ilk sifarişi ilə bağlı danışıqlar gedir. Oxu.Az xəbər verir ki, bu sözləri “Xəzər Dəniz Gəmiçiliyi” QSC-nin mətbuat xidmətinin rəhbəri Mehman Mehdiyev deyib. Onun sözlərinə görə, danışıqlardan asılı olaraq “Laçın” adlı tankerin dünya və ya Xəzər dənizində üzəcəyinə qərar veriləcək.
“Tankerin texniki imkanları ona icazə verir ki, o, maksimum yüklə Volqa-Don kanalı ilə həm dünya sularında, həm də Xəzər dənizində hərəkət edə bilsin. Tankerin unikallığı odur ki, əvvəllər gəmilər Volqa-Don kanalı dar olduğu üçün oradan keçə bilmirdilər. Amma yeni tankerdə bütün bu xüsusiyyətlər nəzərə alınıb”, - deyə M.Mehdiyev əlavə edib.
Qeyd edək ki, Dekabrın 13-də Azərbaycan Respublikasının Prezidenti İlham Əliyevin iştirakı ilə “Azərbaycan Xəzər Dəniz Gəmiçiliyi” QSC-nin (ASCO) sifarişi əsasında “Bakı Gəmiqayırma Zavodu” MMC-də inşa olunan ilk “Laçın” adlı bu tankerin uzunluğu 141, eni 16,9 metrdir.
15 nəfərlik heyətə malik bu gəmi saatda 10 uzel sürətlə hərəkət edə biləcək. Tanker xam neft və neft məhsulları daşınması üçün nəzərdə tutulmuş ümumi tutumu 9212 kubmetr olan 6 yük tankına malikdir. Dedveyti dənizdə 7,875 ton olan tanker iki ədəd “Wartsila” istehsalı mühərriklə təchiz edilib.
“Laçın” tankeri nəinki Xəzərdə neft və neft məhsullarının daşınmasını, həmçinin Volqa-Don və Volqa-Balt kanalları ilə Xəzərdən kənar hövzələrə də maye yüklərin daşınmasını təmin edəcək.
