Avqustun 14-də saat 19:25 radələrində Ermənistan silahlı qüvvələrinin bölmələri Basarkeçər rayonunun Yuxarı Şorca yaşayış məntəqəsi istiqamətində yerləşən atəş mövqelərinin dəstəyi ilə Azərbaycan Ordusunun Kəlbəcər rayonunun Mollabayramlı yaşayış məntəqəsi istiqamətində yerləşən mövqelərinin qarşısında təxribat məqsədilə mühəndis işləri görməyə cəhd göstəriblər.
Bu barədə Azərbaycan Müdafiə Nazirliyindən (MN) məlumat verilib.
"Aparılan işlərin dərhal dayandırılması və atəş nöqtələrinin susdurulması məqsədilə Ordumuzun bölmələri tərəfindən təxirəsalınmaz tədbirlər görülüb", - məlumatda vurğulanıb.
Hadisəni "Sherg.az"a dəyərləndirən hərbi ekspert Ədalət Verdiyev bildirib ki, Ermənistanın həm sərhəddə, həm də Qarabağda mövcud olan qeyri-qanuni silahlı birləşmələrinin fəaliyyətləri sülh prosesini pozmağa və hər iki istiqamətdə eskalasiya yaratmağa hesablanıb:
"Ermənistanın tərəfinin bu qədər fəallaşması müharibəyə gətirib çıxarmasa da, lokal toqquşmalar ehtimalını artırır. Yəni savaş üçün Ermənistan ordusunun real potensialı olmadığına görə müharibə ehtimalını kənara qoyuruq. Digər tərəfdən münaqişəyə üçüncü qüvvənin müdaxilə etməsi mümkün deyil. İndiyə qədər baş verən proseslər onu göstərir ki, Ermənistan Azərbaycanla münaqişə məsələsində Fransa, İran və Himdistanın dəstəyini nəzərə almasaq, tək qalıb. Yəni Rəsmi İrəvanın Bakıya qarşı heç bir təsir və təzyiq mexanizmi mövcud deyil. Ümumiyyətlə üçüncü qüvvələrin məsələyə müdaxiləsi isə NATO üzvü olan Türkiyənin Azərbaycan tərəfindən hadisələrə adekvat reaksiyasına gətirib çıxara bilər ki, bu da həmin güclər üçün böyük fəlakətlər vəd edir".
