Gələn həftə Bakıda Rusiya Silahlı Qüvvələrinin Baş Qərargah rəisi, ordu generalı Valeri Gerasimov və NATO-nun Avropadakı Müttəfiq Qüvvələrinin Baş Komandanı, general Tod Uolters arasında görüş keçiriləcək.
Virtualaz.org bildirir ki, bu barədə "Kommersant" NATO strukturlarındakı mənbələrə istinadən məlumat yayıb.
Müzakirə üçün mümkün mövzular arasında Rusiya və NATO ölkələrində bu il üçün hazırlanan hərbi təlimlər, həmçinin Suriya və Əfqanıstan ətrafındakı vəziyyət var.
İki yüksək rütbəli hərbçinin əvvəlki görüşü 10 iyul 2019-cu ildə baş tutub. O görüş də Bakıda keçirilmişdi. RF Müdafiə Nazirliyinin o vaxt xəbər verdiyi kimi, Valeri Gerasimov və Tod Walters Rusiya-NATO təmas xəttində insidentlərin qarşısını almaq üçün mümkün tədbirləri müzakirə etdilər, Avropa və qlobal təhlükəsizliklə bağlı vəziyyət, habelə hərbi ekspertlərin dialoqunu bərpa etmək perspektivləri barədə fikir mübadiləsi apardılar. Bundan əlavə, terrorizm və dəniz piratçılığı ilə mübarizə, Əfqanıstan və Suriyadakı vəziyyətlə bağlı məsələlər qaldırıldı.
