Razılaşdırılmış sülhü pozanlar öz məqsədlərinə çatmayacaqlar
"Son günlər Minsk Qrupunun hər üç üzvü, o cümlədən bəzi regional dövlətlərin ictimai adamları, millət vəkilləri, rəsmiləri və mediası tərəfindən Azərbaycana qarşı davamlı olaraq təbliğat aparıldığının şahidiyik". Bu sözləri Bakı Politoloqlar Klubunun rəhbəri Zaur Məmmədov deyib. Analitik bildirib ki, bu kontekstdə həm Qərb, həm Rusiya, həm də İran ciddi şəkildə Azərbaycana pressinq edirlər:
"Bu dövlətlər hansısa maraqlarının Bakı tərəfindən qəbul olunmasını istəyirlər. Təbliğata BBC-nin də qoşulması və daxilimizdə bəzi "siyasi fəalların" adı çəkilən "xəbər carçısı"na Bakını tənqid edən şərhlər vermələri sözsüz ki, birmənalı qarşılana bilməz. Rusiya, İran, Fransa kanallarında, o cümlədən BBC-də gedən süjetlərə, o cümlədən Parisin noyabrın ortasında Azərbaycana qarşı qətnamə qəbul etmək fikrində olmasına baxmayaraq sonda Bakının istədiyi olacaq. Azərbaycan- Ermənistan arasında danışıqlara müdaxilə edən və əldə edilən razılıqların icrasının qarşısını almaq istəyən, razılaşdırılmış sülh müqaviləsinin qaralamasını yayan müəyyən dövlətlər öz məqsədlərinə çatmayacaqlar".
