“Ədirnədə Azərbaycan və Türkiyə prezidentlərinin iştirakı ilə mühüm enerji layihəsinin - TANAP-ın ikinci hissəsinin açılışının baş tutmasına sıradan bir hadisə kimi baxmaq olmaz”.
Bunu Sherg.az-a açıqlamasında Demokratik Azərbaycan Dünyası Partiyasının sədri Əlisahib Hüseynov deyib.
Partiya rəhbəri bildirib ki, bu, olduqca mühüm tarixi əhəmiyyətli hadisədir:
“TANAP-ın açılışını simvolik mənada “ikinci Ədirnə fəthi” kimi də dəyərləndirmək olar. Çünki iki türk dövlətinin - Azərbaycan və Türkiyənin birgə layihəsi sayılan TANAP-ın ikinci hissəsinin istifadəyə verilməsi nəticəsində artıq layihə Avropaya çatdı. TAP-ın işə düşməsindən sonra, yəni 2020-ci ildən sonra Azərbaycan qazı Türkiyə üzərindən Avropaya nəql olunacaq. Odur ki, mən vaxtı ilə çoxlarının xülya kimi baxdığı bu mühüm layihənin nəhayət ki, reallaşmasını çox yüksək qiymətləndirirəm. Heç şübhəsiz ki, bu layihələr Avropa üçün həyati əhəmiyyət kəsb edir. Deyərdim ki, hətta strateji əhəmiyyətli bir meqa-layihədir. Çünki məhz bu layihələr sayəsində AB ölkələrinin Rusiyadan və qeyri-stabillik dönəmini yaşayan Yaxın Şərqdən enerji asılılığına son qoyulacaq”.
Ə.Hüseynovun sözlərinə görə, layihələr ilk növbədə Türkiyə və Azərbaycan üçün həm iqtisadi, həm də siyasi baxımdan ölçüyəgəlməz dərəcədə mühüm əhəmiyyətə malikdir:
“Türkiyə Cümhuriyyəti TANAP-ın reallaşdırılması sayəsində dünya enerji bazarında əsas aktorlardan birinə çevrilib. Qardaş ölkənin rəhbəri hörmətli Rəcəb Tayyib Ərdoğan da, türkiyəli ekspertlər də bu faktı təsdiqləyirlər. Azərbaycan Prezidenti İlham Əliyev layihənin qardaş Türkiyənin gücünə güc qatdığını nəzərdə tutaraq çıxışında olduqca maraqlı bir fikir səsləndirdi: “Türkiyənin gücü bizim gücümüzdür, Türkiyənin uğuru bizim uğurumuzdur. Biz birlikdə bundan sonra da iki qardaş ölkə kimi çiyin-çiyinə irəliyə gedəcəyik. Bizim qarşımızda bütün üfüqlər açıqdır. Həyata keçirdiyimiz bu nəhəng layihələr bizim gücümüzü göstərir və bizim gücümüzü artırır. İqtisadi güc nəticədə siyasi gücə çevrilir”.
Cənab Prezidentin ifadələri tarixin sınağından çıxmış məntiqə əsaslanır. Bəli, indi bütün dünyada siyasi gücü iqtisadi güc diktə edir, tənzimləyir. Başqa sözlə desək, siyasi gücünü ortaya qoymaq istəyirsənsə, öncə iqtisadi gücünü formalaşdırmalısan. Azərbaycan və Türkiyə də hazırda məhz bu düstur istiqamətində birgə fəaliyyət göstərir”.
