Səbəb odur ki, erməni cəmiyyəti keçmiş klana dönmək istəmir
Qondarma Dağlıq Qarabağ respublikasının "müdafiə nazirliyi"nin mətbuat katibi olmuş Senyor Asatryan Ermənistanda yaşanan hərbi-siyasi böhrana münasibət bildirib. O, ordu rəhbərliyinə olan dəstəyini gizlətməyib:
"Əlbəttə ki, bu hərbi-siyasi qarışıqlıqda ordu ən çətin vəziyyətdədir. Çünki konstitusiyaya görə, ordu torpaqların təhlükəsizliyini və ərazi bütövlüyünü qorumaq üçün nəzərdə tutulub. Ancaq əvvəllər belə çətin bir vəzifəyə sahib olmaqla yalnız bu yöndə düşünməməli, eyni zamanda hakimiyyəti ələ keçirmiş təsadüfi şəxslərin şıltaqlıqlarına müqavimət göstərməlidir. Xalqın dəstəyi olmadan bu çox çətin olacaq".
Mövzu ilə bağlı "Şərq"ə açıqlama verən politoloq Əhəd Məmmədli vurğulayıb ki, Senyor Asatryan keçmiş Qarabağ klanının nümayəndəsidir. Politoloq qeyd edib ki, o, əvvəlki hakimiyyətdə ordu sıralarında yer alıb:
"İndi onun ordunun dəstəkləməsi təbiidir. Çünki Paşinyana qalxan ordu təbii ki, Moskvadan idarə olunan Qarabağ klanının nümayəndələridir. Bir faktı da nəzərə alaq ki, müharibəni uduzan və darmadağın olan da elə həmin ordudur. Bildiyimiz kimi, Ermənistan sərhədlərini başqa bir dövlət qoruyur. Bu da Ermənistan ordusunun nə qədər pis vəziyyətdə olduğunun bariz göstəricisidir".
Politoloq əlavə edib ki, bütün bu faktlar həm də Ermənistan dövlətinin oyuncaq olduğunun sübutudur:
"Ona görə də, hesab edirəm ki, Senyor Asatryanın çıxışı sadəcə olaraq təmsil olduğu klana bir dəstəkdir. Ola bilər ki, Paşinyan təsadüfi adamdır. Amma fakt odur ki, Ermənistan xalqı onu dəstəkləyir.
Uduzmuş liderinə belə arxa durur ki, təki əvvəlki hakimiyyət - Qarabağ klanı və yaxud da Rusiyanın dəstəklədikləri qüvvələr hakimiyyətə gəlməsin.
Bu artıq erməni cəmiyyəti üçün ciddi bir siqnaldır, Azərbaycan üçün də. Düşünürəm ki, bu cür nüfuzu olmayan şəxslərin açıqlamaları Paşinyana ciddi təhlükə yaratmayacaq".
