“Heç olmasa, Azərbaycanın Dağlıq Qarabağ ətrafında 7 rayonunun azad edilməsi haqqında bir cümlə deyə, bir mövqe bildirəydilər, sonra deyəydilər ki, liderlər münaqişənin həllinə hazır deyillər”
"Azərbaycan Con Kerrinin bəyanatını qəbul etmir”. Bunu Prezident Administrasiyası rəhbərinin müavini, Xarici əlaqələr şöbəsinin müdiri Novruz Məmmədov deyib. O, bildirib ki, münaqişənin tənzimlənməsində iştirak edən super dövlətin dövlət katibinin hakimiyyətdən getmə, seçki ərəfəsində belə bir bəyanat verməsi təəccüb doğurur:
"Bunun qəribə bir mənası var, sanki dünyaya bir mesajdır. Məhz Ermənistan münaqişənin tənzimlənməsi ilə bağlı danışıqlarda liderlərin münaqişənin həllinə hazır olmadığını iddia edir. Tutaq ki, tarixi Azərbaycan torpağı olan Dağlıq Qarabağla bağlı danışıqlarda fikir mübadiləsi aparılır. Azərbaycanın Dağlıq Qarabağ ətrafında olan və 760 minə qədər insanın məcburi köçkün həyatı yaşamasına səbəb olan 7 rayonunun 25 ildən artıq işğal altında qalmasını nə ilə izah etmək olar? Əgər Ermənistan bu 7 rayonu azad edəcəksə, buna bir hazırlıq lazım deyilmi? Bunun üçün isə əsas missiya ABŞ da daxil olmaqla, ATƏT-in Minsk Qrupunun 3 üzvünə verilib. Ancaq hələ də bu sahədə çox böyük uğur görmək mümkün olmayıb”. Administrasiya rəsmisi bildirib ki, Ermənistan işğalçı dövlətdir: "Azərbaycan torpaqlarının azad edilməsi üçün ABŞ da BMT Təhlükəsizlik Şurasında 4 qətnamənin qəbuluna səs verib. Bununla bağlı bir çox beynəlxalq təşkilatlar da qətnamələr və qərarlar qəbul edilib. ATƏT-in Minsk Qrupuna üzv olan 3 dövlətin prezidentləri də "status-kvo”nun dəyişməli olduğunu bəyan edib. Bütün bunları əsas götürüb, heç olmasa, Azərbaycanın Dağlıq Qarabağ ətrafında 7 rayonunun azad edilməsi ilə haqqında bir cümlə deyə, bir mövqe bildirəydilər, sonra deyəydilər ki, liderlər münaqişənin həllinə hazır deyillər. Ona görə də Azərbaycan Con Kerrinin bəyanatını qəbul etmir. İstərdik ki, ABŞ-ın hansısa dövlət qurumu ətraflı, hamının başa düşəcəyi tərzdə Con Kerrinin bəyanatına aydınlıq gətirsin”.
"Dünya ictimaiyyəti beynəlxalq hüququ unudub”
Novruz Məmmədov deyib ki, Azərbaycanın BMT Təhlükəsizlik Şurasına qeyri-daimi üzv seçilməsi ölkənin daxili və xarici siyasətinin dünya ölkələri tərəfindən rəğbətlə qarşılanması demək idi: "Azərbaycan müstəqil, balanslaşdırılmış xarici siyasət həyata keçirir. Kiçik dövlət olsa da, dünyada sülhün və təhlükəsizliyin təmin olunmasında aktiv iştirak edir. Azərbaycan beynəlxalq antiterror koalisiyasına qoşulan ilk ölkələrdən biridir. Hazırda Azərbaycan Əfqanıstana yük daşınmasında əsas rol oynayır. Azərbaycan bir çox üçtərəfli formatların təşəbbüskarıdır. Azərbaycan-Rusiya-İran, Azərbaycan-Türkiyə-İran, Azərbaycan-Türkiyə - Gürcüstan üçtərəfli formatları buna nümunədir. İslam Əməkdaşlıq Təşkilatı Qarabağ münaqişəsinin tənzimlənməsində Azərbaycanın ədalətli mövqeyini müdafiə edir, bununla bağlı qrup yaradılması barədə də qərar verilib. SSRİ-nin süqutundan, "Varşava sistemi” dağılandan sonra dünya ictimaiyyəti beynəlxalq hüququ unudub. Azərbaycan Avropa İttifaqı ilə bərabərhüquqlu əməkdaşlığa üstünlük verir. Biz Avropa İttifaqına daxil olan 8 dövlətlə strateji tərəfdaşlıq müqaviləsi imzalamışıq”. N.Məmmədov vurğulayıb ki, Azərbaycanın həyata keçirdiyi enerji layihələri Asiya və Avropanı birləşdirib: "45 milyard dollar sərmayənin qoyulacağı TAP, TANAP layihələrinin reallaşması yeni səhifə açacaq. Bu gün enerji amili dövlətlərarası münasibətlərə, xarici siyasətə böyük təsir göstərir. Azərbaycan həm də Şərqlə Qərbin mədəni qovşağıdır. Azərbaycan Şərqdə qadınlara ilk dəfə səsvermə hüququ verib, Şərqdə ilk dəfə opera və baletin əsasını qoyub. Azərbaycanda çoxsaylı beynəlxalq tədbirlər keçirilir. Bu xüsusda 2015-ci ildə keçirilən Birinci Avropa Oyunlarını qeyd etmək istəyirəm. İdman sülhün təşviqində böyük rol oynayır. Gələn il isə Azərbaycanda İslam Həmrəylik Oyunları keçiriləcək. Bu tədbirlərin keçirilməsi bu gün asan olmasa da, Azərbaycan idman siyasəti ilə sülhə böyük töhfə verməyə davam edir”.
"Həmsədrlərin düşünüb tapdığı yeganə yol odur ki, Azərbaycan və Ermənistan özü razılığa gəlsin”
Prezident Administrasiyası rəhbərinin müavini deyib ki, dünya birliyi Azərbaycanın ərazi bütövlüyünü tanıyır. Amma təəssüf ki, münaqişə həllini tapmır: "Beynəlxalq birlik daxilində gərginlik beynəlxalq hüquqa riayət edilməməsinin nəticəsidir. İş o yerə çatıb ki, ABŞ dövlət katibi dünyaya guya mesaj verir ki, liderlər münaqişənin həllinə hazır deyillər. ATƏT-in Minsk Qrupunun həmsədrləri indiyə qədər hansı məntiqli variant irəli sürüblər ki, Azərbaycan onunla razılaşmayıb? Azərbaycanın Dağlıq Qarabağ ətrafındakı 7 rayonu niyə azad edilmir? İnsan hüquqlarından, beynəlxalq hüquqdan danışan böyük dövlətlər bir güzgüdə özlərinə baxsınlar. Yüz minlərlə insanın yaşamış olduğu bu 7 rayonun azad edilməsi üçün bu böyük dövlətlər hansı addımlar atıb? Həmsədrlərin ötən illərdə düşünüb tapdığı yeganə yol odur ki, Azərbaycan və Ermənistan özü razılığa gəlsin. Bu, Azərbaycana ədalətsiz, ikili standartlara əsaslanan münasibətin təzahürüdür. Ermənistan iddia edir ki, Azərbaycan kompromislərə hazır deyil. Ermənistan bunu dedikdə Dağlıq Qarabağın bütövlükdə Ermənistana verilməsini nəzərdə tutur. Con Kerrinin bəyanatı daha çox Ermənistanın bu mövqeyinə bənzəyir. ABŞ-ın müvafiq qurumları Con Kerrinin bəyanatları ilə bağlı müvafiq izahat verməlidir. Ermənistan münaqişənin həllinin uzadılmasına çalışır, belə bəyanatlar da buna əsas yaradır”.
İsmayıl
