Rəis narahatdır

Rəsulzadənin nəvəsi Hacıbala Abutalıbovdan prezidentə şikayət edəcək

Azərbaycan Xalq Cümhuriyyətinin (AXC) banisi Məmməd Əmin Rəsulzadənin nəvəsi Rəis Rəsulzadə ölkə başçısına müraciət edəcək. Bu barədə "Şərq”ə açıqlama verən R.Rəsulzadə bildirib ki, babası M.Ə.Rəsulzadəyə qarşı davam edən biganəlik onu belə bir qərar verməyə məcbur edib: "Dəfələrlə AXC-nin qurucusu, dahi lider M.Ə.Rəsulzadənin ev muzeyinin yaradılması ilə bağlı Bakı Şəhər İcra Hakimiyyətinə müraciət etsəm də, qurumdan cavab ala bilməmişəm. Daha doğrusu, bir dəfə uyğunsuz "cavab” veriblər. Əslində tələb olunan məsələnin həllini tapması üçün heç bir ciddi maneə yoxdur. Niyə buna biganə yanaşırlar, anlamıram. BŞİH heç bir əsas da gətirmir. Yəni hansı səbəblərdən dolayı muzeyin yaradılmasına göz yumduqlarını açıqlamır”. R.Rəsulzadə bu məsələdə tək mübarizə aparmayacağını, gələcəkdə müxtəlif hüquqi və ictimai təşkilatlara da müraciət edəcəyini bildirib: "Əlbəttə, belə bir fikrim var. Əgər görsəm ki, məni eşitmirlər, onda digər vasitələrlə səsimi eşitdirməyə çalışacam. Hətta məsələ ilə bağlı cənab prezidentimiz İlham Əliyevə və xanımı Mehriban Əliyevaya da müraciət etməyi düşünürəm. Yəqin ki, o müraciətdən sonra problem öz həllini tapacaq”. Mədəniyyət və Turizm Nazirliyindən isə bildiriblər ki, sözügedən muzeyin yaradılması üçün mütləq hökumət tərəfindən qərar verilməlidir. İllərdir açılmayan muzey məsələsinə aydınlıq gətirmək üçün BŞİH-nin mətbuat xidməti ilə əlaqə saxlamağa çalışsaq da, qurumdan telefonlarımıza cavab verən olmadı.