Ermənistan iqtidarı Qarabağın müstəqilliyini tanıya bilməz

Ermənistan parlamentində qondarma "Dağlıq Qarabağ Respublikası”nın müstəqilliyinin tanınması ilə bağlı qanun layihəsi yenə səsvermədən keçməyib. Sözügedən qanun layihəsinin müzakirəsi qarşılıqlı ittihamlar şəraitində keçib. Nəzərinizə çatdıraq ki, Qarabağı müstəqil dövlət kimi tanımaq təklifi Ermənistan parlamentinə müxalifətdə olan "İrs” Partiyası çıxarıb. Amma millət vəkillərinin əksəriyyəti bildirib ki, belə tanıma münaqişənin sülh yolu ilə həllinə dair hazırda aparılan danışıqlara zərbə vurar. Bu baxımdan parlamentdəki fraksiyaların əksəriyyəti isə bu məsələyə dair səsvermədə iştirakdan imtina edib. Onu da qeyd edək ki, separatçı qurumun tanınması ilə bağlı Ermənistandakı müəyyən dairələrin dəfələrlə cəhdləri olsa da, son anda ölkə hakimiyyəti bundan çəkinib. Maraqlıdır ki, bu dəfə həmin məsələ iki gün parlamentdə müzakirə mövzusu oldu. İki ölkə prezidentlərinin görüşü ərəfəsində belə bir məsələnin parlamentin müzakirəsinə çıxarılması, istər-istəməz, müəyyən suallar doğurur. Yəni bu sadəcə nəyəsə hesablanmış bir oyun idi, yoxsa həqiqətən Ermənistan separatçı qurumun "müstəqilliyini” tanımaq istəyir? Hər iki halda bunun arxasında hansı məqsədlər dayanır? Azərbaycan Dövlət İdarəçilik Akademiyasının Siyasi Araşdırmalar İnstitutunun direktoru, siyasi elmlər doktoru, politoloq Elman Nəsirlinin qənaətincə, Ermənistan müxalifəti qondarma Dağlıq Qarabağın müstəqilliyini tanınmasına çalışsa da, iqtidar heç vaxt buna yol verməz: "Bu mənada iqtidarla müxalifətin fikirləri üst-üstə düşmədiyi üçün müzakirələr son nəticədə fiaskoya uğrayır. Ermənistan iqtidarı fərqindədir ki, DQ-nin müstəqilliyinin tanınması ilə bağlı Ermənistan parlamenti qərar qəbul etsə, bu qərar nəticə etibarı ilə sülh danışıqlarının tamamilə kəsilməsinə gətirib çıxaracaq. Çünki Ermənistan parlamentində Qarabağın müstəqil dövlət kimi tanınmasından sonra Qarabağın işğaldan azad olunması ilə bağlı sülh danışıqlarının aparılmasına, ümumiyyətlə, ATƏT-in Minsk Qrupu formatına ehtiyac qalmayacaq. Belə olan halda isə "danışıqlar dalana dirənib” ifadəsi əvəzinə "danışıqlar prosesi tamamilə kəsildi” ifadəsi işlənəcək. Danışıq kəsilən anda isə müharibə qaçılmazdır. O müharibə ki, onun alovlanmasını nə ATƏT, nə də digər beynəlxalq qurumlar istəyir. Heç müharibənin başlanması Ermənistana da sərf eləmir. Çünki bu zaman ermənilər çox böyük fəlakətlərlə üzləşməli olacaq. Onlar bu reallığı çox gözəl bilirlər. Sadəcə DQR-in tanınması məsələsini zaman- zaman parlamentə daşımaqla Azərbaycana qarşı "oyun oynayırlar”. Onlar bu məsələni gündəmə gətirməklə ondan Azərbaycana qarşı təzyiq vasitəsi kimi istifadə etmək siyasəti yürüdürlər. Ermənistan iqtidarı göstərmək istəyir ki, müxalifət və digər ciddi qüvvələr DQR-in tanınmasını istəyir. Ancaq iqtidar bu aksiyanın reallaşmasına imkan vermir. Bununla da beynəlxalq ictimaiyyətdə işğalçı kimi bilinən Ermənistanın sülhpərvər obrazını formalaşdırmağa və realist bir siyasət yeridən tərəf kimi qəbul etdirməyə çalışırlar”. E.Nəsirlinin sözlərinə görə, DQR-in tanınması məsələsini müzakirəyə çıxaran tərəf - "İRS”-in özü də bilir ki, bu müzakirə baş tutmayacaq. Sadəcə onlar həm bizə qarşı təzyiq elementi kimi bundan istifadə edirlər, həm də bu yolla özlərinin təhlükəsizliyini qoruyurlar.