Ötən gün ölkəmizdə Azərbaycan ordusunun yaranmasının 100 illik yubileyi qeyd olundu və bu münasibətlə möhtəşəm hərbi parad keçirildi. Televiziya kanallarımız isə hərbi paradı işıqlandırmaqla bərabər, müxtəlif verilişlər hazırlayaraq hərbi mövzularla bağlı müzakirələr təşkil etdilər. "Xəzər” televiziyasında yayımlanan "Hər şey daxil” verilişdə isə aparıcı Tarix Əliyev (Tolik) və müğənni Röyanın Azərbaycan Silahlı Qüvvələri günü mövzusunda müzakirələr aparması sosial şəbəkələrdə birmənalı qarşılanmadı. İstifadəçilər qeyd ediblər ki, belə önəmli tarixi gündə mütəxəssislərin, hərbçilərin, hərbi sahəyə daxil olan insanların mövzu ətrafında danışması daha münasib olardı. Ümumiyyətlə, əksəriyyət televiziya kanallarının əlamətdar hadisələrin ildönümünə, tarixi əhəmiyyətli məsələlərə etinasız yanaşdığı qənaətindədir.
Müzakirələrə səbəb olan veriliş haqqında "Sherg.az”a danışan tanınmış jurnalist, teletənqidçi, professor Qulu Məhərrəmli isə istənilən Azərbaycan vətəndaşının istənilən mövzuda danışmaq hüququ olduğunu diqqətə çatdırıb.
O vurğulayıb ki, aparıcı, prodüser Tolik və müğənni Röya da hər bir mövzuda fikir səsləndirə bilərlər:
"Sadəcə bəzi mövzuların öz mütəxəssisləri var. Yaxud elə şəxslər var, onların özlərinə aid olmayan mövzuda müzakirə aparması xoş qarşılanmır. Buna necə diqqət edilməsi isə televiziya siyasəti, peşəkar duyumla bağlı olan məsələdir. Müğənni və prodüserin hərbi mövzudan, ordumuza aid tarixi hadisədən danışması, bunun mənfi qarşılanması isə daha çox yanlış menecer yanaşmasıdır.
Bu, mövzunu gözdən salmaq, qeyri-ciddilik halına gətirməkdir. Ola bilər, hansısa mövzu gündəmə gətirilsin, veriliş iştirakçıları ötəri fikrini bildirsin. Amma ciddi məsələlərdən, elə də ciddi imici olmayan şəxslərin söhbət aparması mövzunun özünün zərərinədir.
Ənənəvi olaraq, televiziya rəhbərlərinin ciddi proqram yayımlamaq, tarix göstərmək fikri varsa, nəyə görə mütəxəssisləri dəvət etmir? Tolikin və Röya xanımın ənənəvi mövzuları var, onlar həmin konteksdə qəbul olunub. Bu barədə onları tənqid edən şəxslərin fikri ilə razıyam ki, belə məsələləri anlamaq üçün ciddi televiziya idarəçisi olmağa ehtiyac yoxdur. Bir qədər təcrübəsi olan şəxs bilir ki, belə mövzuda kimləri efirə çıxartmaq olar.
Hər hansı bir televiziya hazırladığı verilişlə ordunun imicini yaratmağa çalışırsa, 100 yaşı olan silahlı qüvvələrin tarixi, 1918-ci ildən indiyə qədər keçdiyi yol haqqında müzakirə aparmaq istəyirsə, bu sahədə fəaliyyət göstərən mütəxəssislərə müraciət edə bilərdi. Belə tarixi hadisəni, önəmli mövzunu aşağılayacaq şəkildə ortaya çıxarmaq düzgün deyil".
Verilişi bu linkdən izləyə bilərsiniz:
https://th-tv.org/tv/hər-şey-daxil-röya-ayxan-silahlı-qüvvələr-günü-26-06-2018-XYFFzB5xyCY.html
Aysel Aslan
