"Neftin qiymətlərinə təsir edən amil ABŞ-da neft ehtiyatları ilə bağlı hesabatın açıqlanmasıdır”.
Bunu "Sherg.az”a Azərbaycan neftinin qiymətinin ucuzlaşmasından danışarkən Neft Araşdırmaları Fondunun rəhbəri İlham Şaban deyib.
O vurğulayıb ki, qısamüddətli dövr üçün neftin qiymətinin dəyişməsi normal situasiyadır:
"Neft qiyməti sabit qalan məhsul deyil. "British Petroleum” (BP) şirkətinin rəhbəri öz çıxışında bildirib ki, yaxın iki ildə neftin qiyməti 50-65 dollar arasında dəyişəcək. Bu isə istehlakçılar üçün ən optimal qiymətlərdir.
Dünyanın təqribən 70 faizi neft istehlak edən ölkədir. Ona görə, həmin ölkələrin normal iqtisadi inkişafı üçün stabil qiymətlər lazımdır. 10-15 faiz xətalar ola bilər. Amma məsələn, 50 faiz dəyişmələr olanda arzuolunmaz hallar yaranır. Ötən ilin orta qiyməti "Brent” markalı neft üçün 54 dollar idi. Bazar təxmini bu həddə qiymətlərə köklənib”.
İ.Şaban onu da əlavə edib ki, cari il üçün orta qiymət proqnozu 57 dollar göstərilib:
"Ancaq bu il mövsumi məsələlər özünü kəskin göstərdi. 2018-ci ilin ilk rübündə yüksək qiymətlər müşahidə olundu. Buna görə, orta qiymətin 60 dollardan yüksək olacağı proqnozlaşdırılır.
Qeyd edək ki, "Azeri Light” markalı neftin bir barrelinin qiyməti 1,17 dollar ucuzlaşaraq 65,28 dollar olub. Londonun ICE ("InterContinental Exchange Futures”) birjasında "Brent” markalı neftin bir barrelinin qiyməti 0,20 dollar bahalaşaraq 63,81 dollar, Nyu-Yorkun NYMEX ("New York Mercantile Exchange”) birjasında "Light” markalı neftin bir barrelinin qiyməti isə 0,16 dollar artaraq 60,28 dollar təşkil edib.
Aysel Aslan
